Премію Pro Minoritatum Hungarie 2025 здобыла Іріна Сюч-Ворінка

Мадярьска влада уділює каждый рік Премію Pro Minoritatum Hungarie за културны актівности членів народностных меншын, котры суть офіціално вызнаны в тій державі. Премія уділює ся при нагоді Світового дня културной розмаїтости про діалоґ і розвиток, якый в календарі припоминаме собі 21-го мая.

Премія може быти уділена особам або орґанізаціям, котры належать ку офіціално вызнаным в Мадярьску народностным меншынам, і котры роблять актівности про розвиток і захованя културной дідовизны, материньского языка окремой народностной меншыны, ці котры свойов роботов помагають ку співжытю народів Карпатьского басейну.

І тот рік 21-го мая 2025-го року одбыв ся в Будапешті Ґалавечур народностей, котрый орґанізовав Державный секретаріат про конфесійны і націоналны капчаня Уряду председы влады.

Меджі 13-ма оціненыма Премійов Pro Minoritatum Hungarie 2025, кедьже Мадярьско має 13 вызнаных народностных меншын, мали свого представителя і Русины. Премію здобыла Іріна Сюч-Ворінка.

Іріна Сюч-Ворінка абсолововала штудії на Пряшівскій універзіті в Пряшові, де на мадярьскім і русиньскім інштітуті штудовала мадярьску і русиньску філолоґію. Того часу є научным секретарьом Русиньского научного інштітуту імени Антонія Годинкы в Будапешті, секретарьом журналу Русинськый світ, котрый выходить в Мадярьску, а так само є головов русиньской матурітной комісії.

Премію передавали Мікловш Шолтес – заступник міністра, державный секретарь Канцеларії премєра про конфесійны і націоналны капчаня, і Золтан Фюрєш – заступник державного секретаря. На сяточній події были присутны і Віра Ґіріц – представитель Русинів у Парламенті Мадярьска, а Віктор Крамаренко – голова Вседержавного русиньского самосправованя.

Іріна Сюч-Ворінка здобыла у 2023-ім році од Вседержавного русиньского самосправнованя в Мадярьску Премію імени Антонія Годинкы