Пренос Божеской Літургіі з церкви свв. Космы і Даміaна в Студзьонках – неділя, 15.00 год.

В неділю, 26. липця/юлия 2020 р., о 15.00 год. просиме слухати пренос днешньой Святой Літургіі з церкви свв. Космы і Даміана в Студзьонках, яка приналежыт вроцлавско-щеціньскій єпархіі Польской Автокефальной Православной Церкви.

Літургію служыт отец прот. Славомир Сороканич. Літургія правлена є в церковнославяньскым языку, казаня є по русиньскы.

Перше православне богослужыня правлене было в старій понімецкій сельскій каплици уж 16. листопада/новембра 1947 рока. На тоту обшыр выселены были головно жытелі села Перунка. Першым парохом был о. Димитрий Хыляк, єден з діячів Руской Народной Республикы Лемків, якій был выселеный з Ізб.

Вельо років вірны прібували достати згоду на ремонт і перебудову обєкту. Аж кінцьом 80. років ХХ ст. завдякы впертости товдышнього пароха о. Михала Шляґы зачала ся розбудова каплиці. Церков пошырили о 4 метры, зробили новый, звінченый баньом дах. Попри церкви поставили дзвінницю. В храмі помістили памятниковый іконостас з Томашова Мазовєцкого, якій походил з приватной каплиці царя Миколая ІІ. Іконостас был подарком владыкы лодзіньского і познаньского Шымона. В вересни/септембрі 2001 рока парохію перенял о. Славомир Сороканич. Теперішній выгляд святыні то ефект реновациі обєкту, яка прошла в роках 2002-2003.

По днешній Літругіі настоятель і вірны склали желаня долголітньому дякови церкви, Владимірьови Олеснєвичови, якій скінчыл 98 років. На многы і благы літа!