Пренос Божеской Літургіі з церкви Воскресіня Христового в Ліґници – неділя, 15.00 год.

В неділю, 7. марця 2021 р., о 15.00 год. просиме слухати пренос Божеской Літургіі з церкви Воскресіня Христового в Ліґници на Нижнім Шлеску. Парохом церкви є о. Любомир Воргач.

За дату ериґуваня православной парохіі в Ліґници принимат ся 15. лютого/фебруара 1948 р., коли было одслужене перше богослужыня в приватным мешканю. Початково, через короткій час, парохія містила ся в поблизкым Яворі. Внет повело ся вірным отримати част євангелицкого Марияцкого костела при ул. Панєньскій в Ліґници.

Од початку парохію творили в більшости вірны з Лемковины, примусово оселены в околицях Ліґниці по проведіню акциі «Вісла» – были то предовшыткым Ізбяне, але і выселены з Холмщыны і полудньового Підляша Украінці, Білорусины, а тіж Грекы і Македонці, якы на зламі 50. і 60. років ХХ ст. выіхали до своіх держав.

В 1975 р. парохія перенесла ся до євангелицкого костела з 1833 р., якій находит ся при ул. Коссак в Ліґници. Неодолга храм был пристосуваный до потреб православной літургіі. В 1977 р., в результаті выливу рікы Качавы, церков мусіла быти одреставрувана. В 1983 р. ю посвячено. Початком ХХІ ст. в сусідстві побудувано приходство, а пару років тому проведено цілковитый ремонт святыні.