Презентація книжкы Александра Керестеші у Виноградові

В четверь 21-го авґуста 2025-го року у Виноградівскій централній публічній бібілотеці одбыла ся презентація книжкы русиньского писателя Алексансдра Керестеші під назвов Пійсят из Човлентом.

Літературну подію орґанізовало Закарпатьске областне науково-културолоґічне общество імени Александра Духновіча, котрого голова – Юрій Продан, быв і модератором презентації. Як інформовала бібліотека, Продан у вступнім приговорі підкреслив значіня той книгы, і пожелав авторови далшы творчі успіхы.

На події приговорив ся і Юрій Шиповіч, голова Русиньского културолоґічного клубу, підкарпатьскый корешпондент радія lem.fm, котрый поділив ся із своїма чувствами односно творчости Александра Керестеші.

Віршы Александра Керестеші звучали в четверь у выконаню Тетяны Микиты, Марічкы Рацин i Тетяны Рацин, котра так само пише стихы по русиньскы. Атмосферу літературной стрічі в бібліотеці збогатив музичный проґрам у выконаню Роберта Тіводора, Антона Галаса і Василя Січа.

Александер Керестеші (р. 1975) є родаком із села Дротинці на Підкарпатю. Пише по русиньскы під своїм іменом, але і під псевдонімами. Його творы мож найти і в зборниках Алманах днешньої русинської літературы, котры выходять шторік на Підкарпатю, і презентують нову, сучасну русиньску літературу того реґіону.