Презідент Пеллеґріні має радника про меншыны

Корпус радників презідента Словацькой републікы Петра Пеллеґріні розшырив ся о радника про народностны комуніты. Став ним бывшый председа партії Magyar Szövetség – Maďarská aliancia Крістіан Форро.

„Кедьже К. Форро уж актівно не анґажує ся в політіці, з презідентом СР доїднали ся на обсаджіню даного місця,“ інформовав у віторок 20-го мая 2025-го року офіціалный сайт презідента Словацькой републікы.

Крістіан Форро кандідовав на презідента у вольбах в році 2024. Перед другым колом волеб, до котрого не поступив, офіціално підпорив якраз Петра Пеллеґріні, котрый до другого кола ішов з Іваном Корчоком.

„Його зачавов буде актівно глядати можливости зліпшіня поставліня вшыткых народностных комуніт на Словакії,“ пише сайт презідента. На Словакії притім леґіслатіва пише о народностных меншынах, включно Конштітуції СР, не о народностных комунітах. О комунітах звыкли бісідовати головно мадярьскы політіци.

„Моїм цільом є підпорити ідею, же презідент СР Петер Пеллеґріні є презідентом вшыткых людей, і помочі створити комунітам таке оточіня, жебы ся чули як рівноцінны гражданы Словакії,“ цітує презідентьскый сайт нового радника. Форро подля сайту буде і в делеґаціях презідента в рамках реґіоналных выїздів по Словакії.

Як сайт далше інформовав, новый радник уж абсолвовав їднаня з уповномоченым влады СР про народностны меншыны Акошом Гороньом, з котрым діскутовали о вопросах далшой співпраці. Першым резултатом бы мало быти „скликаня округлого стола представителів народностных комуніт до кінця юна того року в Презідентьскім палаці“.

Попередня презідентка СР Зузана Чапутова такой по своїм зволіню створила порадный орґан із вопросів народностных меншын, в котрім мали по двох представителів мадярьска, ромска і русиньска меншына. Єден представитель в тім орґані быв за далшы меншыны і новы меншыны.

Презідент Пеллеґріні у кампани перед вольбами говорив о тім, же хоче мати комунікацію з народностныма меншынами, но форму, яков то хоче рішыти, не шпеціфіковав. За презідента быв зволеный 6-го апріля 2024-го року, до функції наступив 15-го юна. Радника про меншыны выменовав по веце як році од свого зволіня.

Фото: prezident.sk.