Президентска пара гостила реліґійны і нацийональны меншыны

14. січня/януара Президент Польской Республикы Кароль Навроцкій і Перша Дама Марта Навроцка приняли в Президентскым Палаци в Варшаві представників ріжных церкви і вызнаньовых звязкых та нацийональных і етнічных меншын.

То традиция, яка єст продолжана по черзі ріжныма президентами. Як раз Кароль Навроцкій мал змогу першыраз гостити репрезентантів ріжных церкви і костелів та меншын.

Президент в слові до згромадженых повіл, што чує ся одповідальным за вшыткых громадян Польской Республикы без огляду на тото, в якым храмі ся молят до Господа, з якой нацийональной меншыны походят.

«То все єст про мене зворушаюче як для Президента, што в польскых воєнных кватерах, на польскых цмонтерях на цілым світі, на польскых гробах тых, якы за Польщу гынули, сут латиньскы, православны кресты, сут пілмісяці і звізды Давида. Тото значыт, што тоты люде смотрили на Польску Республику як на свою отчызну, незалежно од того, што молили ся в другых языках ци в інчых храмах» – бесідувал Кароль Навроцкій.

За словами президента Польща є днес одкрыта на нацийональны меншыны і ріжны віроісповіданя.

В новорічній стрічы участ взяли представникы римокатолицкого Костела, репрезентанты віроісповідань, што входят до Польской Екуменічной Рады, і другы. Польску Автокафеличну Православну Церков репрезентувал митрополита варшавскій і цілой Польщы Сава. Присутный был тіж владыка Юрий, архієпископ вроцлавско-щеціньской єпархіі ПАПЦ, Православный Ординарий Польского Войска та владыка Григорий, архієпископ більскій.

Грекокатолицку Церков (УГКЦ) представлял митрополита Євген Попович, архієпископ перемышльско-варшавскій та другы правлячы єпископы: Володимир Ющак (вроцлавско-кошаліньскій), Аркадит Трохановскій (ольштыньско-ґданьскій) і Мариюш Дмитерко (помічный владыка вроцлавско-кошаліньскій).

Окрем Президента і інчых, зо своім словом выступил Григорий Куприянович (член украіньской меншыны), спілведучый Спільной Комісиі Уряду та Нацийональных і Етнічных Меншын. В стрічы брал участ проф. Штефан Дудра, член СКУтНіЕМ за лемківску етнічну меншыну.

Стріча з президентском паром одбыла ся в часі припадаючым на Тыжден Молитв о Єдніст Християн, але так само в Новый Рік за юлияньскым календарьом.