Про навщівників кріпты в Осаднім змодернізовали авдіопроводника

Екелтронічного проводника в кріпті з остатками павшых вояків з Першой світовой войны в селі Осадне, Сниньского окресу, змодернізовали. До ходу го офіціално дали в остатніх днях.

Як інформовав аґентуру TASR отець Петро Сорока, православный духовный в Осаднім, проводник там вже быв наіншталованый, но перед веце як роком ся зопсув вдяка вогкости.

„Окрім словацького, російского, анґліцького, німецького і польского вам повість вшыткы інформації і в русиньскім а мадярьскім языку. Модернізація была і у выліпшіню німецького языка,“ повів Сорока з тым, же проєкт быв підпореный з розрахунку Пряшівского самосправного краю. Змодернізованьом заряджіня хотять подля Сорокы кріпту іщі веце одкрыти навщівникам нелем з домова, але і зо заграніча.

Кріпта ся до відома шыршого кругу людей зачала діставати головно по їй реконштрукції у 2005-ім році. Авдіопроводника зробили в році 2012. В пятьох языках бісідовав навщівникам о історії села, кріпты, храму, о вояках і інтересностях в околіці. „Тото заряджіня было барз часто хосноване головно зато, бо є самообслужне, і кріпта є одкрыта нонстоп,“ доповнив Сорока. По тім, што ся зопсуло, наіншталовали в кріпті таблічкы з QR кодами.

Кріпта вояків з Першой світовой войны ся находить під Православным храмом Вознесіня Господа і є єдинов свого тіпу на Словакії. Суть в ній остаткы 1025 павшых вояків російской і австро-угорьской армії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА