ПСК одкрыв схему дотацій на 2026-ый рік

Села, міста, безпрофітовы орґанізації, обчаньскы здружіня, реґістрованы церькви ці фізічны і юрідічны особы уж можуть заганяти жадости до выголошеных схем дотацій Пряшівского самосправного краю (ПСК) на 2026-ый рік.

Як за ПСК інформовала Леа Леготьска, три вызвы суть одкрыты од 1-го януара 2026-го року до 1-го фебруара. Край цілково розділить в тім році аж 2,4 міліона евр, причім найвекша частка – 1,95 міліона евр, є алокована у Вызві посланців ПСК.

Заінтересованы можуть жадати о фінанції у тій вызві в семох проґрамах, і то в проґрамі шпорт, култура, соціалны службы, родинна самосправа, підпора жывотного оточіня і розвиток енвіроменталной свідомости, підпора обще хосенных служеб у здравотництві, діти і молодеж.

Мінімална вышка дотації є 500 евр, максимална 5000 евр, причім сполуфінанцованя є на уровни 20-ох процент. Успішны жадателі у Вызві посланців ПСК бы мали быти выголошены в місяці май.

У Вызві Партіціпатівный розрахунок, котра є заміряна на реалізації публічнохосенных проєктів і обще хосенных служеб, є тот рік алокованых 390 тісяч евр. Сума дотації на єдну жадость є встановлена на 10 000 евр. О тій вызві будуть вырішовати люди.

Список приголошеных проєктів буде публікованый на вебсайті ПСК 2-го апріля. Наслідно будуть люди годны заганяти SMS од 7-го до 21-го апріля тому проєкту, котрый хотять підпорити. Десять днів од закінчіня голосованя самосправа опублікує список підпореных проєктів.

Із каждого окресу будуть притім підпорены два проєкты, котры здобудуть найвекше чісло SMS голосів, а жупа так само підпорить проєкты подля найвысшого чісла здобытых SMS голосів у рамках вшыткых окресів ПСК аж до вычерьпаня грошей.

У Вызві Рішіня потравиновой доступности, котра є заміряна на амбулатный продай посередництвом мобілных склепів, є алокованых 60 тісяч евр. Жадати о дотацію можуть села до 3000 жытелів, котры не мають камянный склеп.

Веце інформацій о условіях при подаваню жадостей мож здобыти на сайті Пряшівского самосправго краю.