ПСК розділить в слідуючім році через дотації 2,4 міліона евр

У віторок 18-го новембра 2025-го року одбыло ся засіданя Заступительства Пряшівского самосправного краю (ПСК). Крайскы посланці окрім іншого вырішыли, же в році 2026 піде на схемы дотацій 2,4 міліона евр. Інформовало о тім Одділіня комунікації ПСК.

Пряшівскый самосправный край буде в слідуючім році господарити із розрахунком майже 553 міліонів евр. В порівнаню із тым роком то є о 244 міліонів евр веце.

Дотації будуть придільовати ся в трьох вызвах. Заінтересованы будуть годны подавати жадости од 1-го януара до 1-го фебруара 2026-го року.

Найвеце грошей у Вызві посланців

Найвеце грошей, аж 1,95 міліона евр, розділять посланці у Вызві посланців ПСК селам, містам, безпрофітовым орґанізаціям, гражданьскым здружіням, реґістрованым церьквам, фізічным і юрідічным особам.

У тій вызві є сім проґрамів – шпорт, култура, соціалны службы, родинна самосправа, підпора жывотного оточіня і розвиток енвіроменталной свідомости, підпора обще хосенных служеб у здравотництві, діти і молодеж.

Мінімална сума дотації є 500 евр, максімална 5 тісяч евр, співфінанцованя є на уровни 20 процент із боку жадателів. Успішны жыдателі бы мали быти выголошены в місяці май.

Можливость партіціпатівного розрахунку

У Вызві Партіціпатівный розрахунок, котра заміряна є на реалізацію публічнохосенных проєктів і обще хосенных служеб, є алокованых 390 тісяч евр. Жадати в тій вызві можуть реґістрованы церькви або реліґійны громады, безпрофітовы орґанізації і гражданьскы здружіня.

На єдну жадость є встановленых 10 тісяч евр, причім о успішных проєктах будуть голосовати люди посередництвом SMS. Список приголошеных проєктів буде публікованый на сайті ПСК 2-го апріля 2026-го року. Голосовати ся буде од 7-го до 21-го апріля.

З каждого проєкту будуть підпорены два проєкты, котры здобудуть найвеце SMS голосів. Жупа так само підпорить далшы проєкты подля найвысшой кількости голосів у рамках вшыткых окресів ПСК аж до вычерьпаня грошей.

Рішають і мобілны склепы

У Вызві Рішіня потравиновой доступности, котра заміряна є на додаваня служеб амбулантного продаваня посередництвом мобілных склепів, є алокованых 60 тісяч евр. В тій вызві можуть быти жадателями села до тісяч жытелів, котры не мають камянный склеп із потравинами.

У вызві, в котрій село може здобыти дотацію 1000 евр, будуть успішны жадателі выголошены в марці 2026-го року.