ПСК жадать Брусел о окремый Interreg із Українов. Має помочі выходній Словакії

Словакія веде в Бруселі переговоры о створіню окремого проєкту Interreg із Українов, котрый бы поміг розвитку выходной части країны. Повів то про аґентуру TASR председа Пряшівского самосправного краю (ПСК) Мілан Маєрьскый в рамках Пленарного засіданя Европского комітету реґіонів у Бруселі, котрый проходив 4-го і 5-го марца 2026-го року.

Жупан Маєрьскый уточнив, же про Пряшівскый край, котрый о такый окремый проєкт пожадав, є ключовым, же новы рамкы підпоры пригранічных реґіонів, котры представила Европска комісія, односять ся і на реґіоны, котры сусідять із Українов, значіть на реґіоны выходной Словакії.

Якарз на то председа ПСК звертав увагу і в рамках проактівных інтервенцій Пряшівского краю в Бруселі почас білатералных стріч із підпредседом Европской комісії Раффаелом Фіттом, як і далшыма представителями Европской комісії.

Война скінчіть, близкы односины треба пестити

Председа ПСК звернув увагу, же война на Україні раз скінчіть і Словакія мусить быти пририхтована на то, жебы знала партіціповати на обнові Україны.

„Кедь будеме добрі пририхтованы, пак і Україна увидить, же маєме отворену наруч. Мі не любить ся, яку позіцію має влада Словакії, ці уж при енерґетіці або при далшых рішінях. Покля є хтось постигнутый войнов, треба му помочі. Близкы сусідьскы і добры односины із Українов треба пестити,“ пояснив.

За словами жупана є Україна „єдным кроком“ уж в Европскій унії, і высловив надію, же приступовы переговоры будуть продовжовати так, жебы стала рядным членом, і пак бы добры сусідьскы односины із Словакійов могла выконовати і через різны европскы проєкты.

Веце грошей про Пряшівскый край і про Підкарпатя

„Дотеперь мы мали проєкт Interreg NEXT, в котрім европроєкты у співпраці із Українов робили Польща, Словакія, Мадярьско і Румунія. Робиме на тім, і тискаме на Европску комісію, як і на еврокомісаря Фітта, жебы быв окремый україньско-словацькый проєкт, жебы мала Словакія Interreg прямо із Українов так, як то маєме із Польщов,“ повів Маєрьскый.

Додав, же у тім ділі уж двараз бісідовав із еврокомісарьом про когезію і реформы Раффаелом Фіттом.

Маєрьскый припомянув, же покля бы такый окремый Interreg подарило ся просадити, значіло бы то веце фінанцій на обнову словацькых реґіонів – Кошыцького і Пряшівского самосправного краю, на україньскім боці граніці бы то была Закарпатьска область Україны.

„Є то на добрій пути. Комісарь Фітто не вылучів тоту можливость, і de facto підтримує то. Самособов, потребують то іщі схвалити,“ повів пряшівскый жупан.

Додав, же бы ішло о проєкты різного характеру, найчастіше проєкты в области транспорту і інфраштруктуры, але є в тім і область културы, обнова памяток або будов, котры служать на публічны цілі, а суть там і освітні актівности.

Вірить, же то не буде гра з часом

На ворос аґентуры ТASR, коли Словакія може очековати конкретну одповідь еврокомісії або комісаря Фітта, Маєрьскый высловив надію, же не під о гру з часом, і же ся приймуть скоры крокы на то, жебы вшытко было вчасно схвалене.

Подля офіціалного становиска ПСК стратеґія Евроской унії про пригранічны реґіоны одкрывать принагоду на звыгоднене фінанцованя інфраштруктуры з двоякым хоснованьом, енерґетічну трансформацію, черезгранічны конектівіты і реґіоналный розвиток.