Рада партнерства ПСК схвалила проєкты за веце як 60 міліонів евр

Пряшівскый самосправный край (ПСК) має схвалены далшы атрактівны проєктовы заміры, котры творили ся на теріторії краю, і поможуть розвитку реґіону.

Проєкты за веце як 60 міліонів евр схвалила Рада партнерства Пряшівского самосправного краю, котра є реґіоналнов платформов співпраці його партнерів і вырішує о перерозділіню фінанцій із Проґраму Словакія.

Про ПСК суть фінанції в тім проґрамі в сумі 294 міліонів евр. Актуалны заміры, котры были підпорены, суть окрім іншого в области модернізації драг, обновы народных културных памяток ці области розвитку турістічного руху.

„Тото суть далшы проєкты, котры вышли прямо з нашых реґіонів од старостів, пріматорів і містных жытелів, значіть із самосправ,“ повів в понедільок 25-го новембра 2024-го року по засіданю Рады партнертва ПСК пряшівскый жупан Мілан Маєрьскый.

„Інтеґрованы теріторіалны стратеґії – то добрый і головно адресный концепт, як ефектівно і добрі перерозділити фінанції з Проґраму Словакія – Европского фонду реґіоналного розвитку, і як якостно черьпати еврофондовы грошы. 26 проєктів є днесь у фазі, коли собі жадателі вже можуть подавати жадости на Міністерстві інвестіцій, реґіоналного розвитку і інформатізації Словацькой републікы о ненавернутельну фінанчну дотацію,“ пояснив председа ПСК Маєрьскый.

В рамках підпореных проєктів буде ся ревіталізовати наприклад і простор коло Малого каштеля в Снині ці околіця Музея модерного уменя Енді Варгола в Меджілабірцях.

У великій мірі подпорив ся і турістічный рух на Вышнім Земліні, і в околіці Домашы а Полонин. Цілково є в тій области підпореных 9 із 26 проєктів. Так само в тій области быв підпореный проєкт, якый дотулять ся музея Варгола в Меджілабірцях, але і музея, котрый має русиньске село Збой.

Єдночасно на список пріорітных замірів ПСК рада придала три десяткы новых проєктів в цілковій сумі 15 міліонів евр. Іде о проєкты ціклотурізма і турізма в реґіонах Спіш і Шаріш, ці о проєкты реліґійного і воєньского турізма. Часовы рамкы реалізіції схваленых проєктів суть в горізонті років 2025 аж 2027.

Рада партнерства ПСК має 36 членів і є то реґіоналный орґан, котрого задачов є коордіновати розвиток теріторії за помочі фінанчных средств із Проґраму Словакія, а посередництвом інтеґрованых проєктів выбраных субєктів.