Радник презідента про меншыны Форро стрітив ся з Міланом Яном Піліпом

„Кажда комуніта має свою історію – і кажда з тых історій є частков історії Словакії,“ написав у віторок 12-го авґуста 2025-го року на своїм офіціалнім профілі на сіті Facebook Крістіан Форро, радник презідента Словацького републікы Петра Пеллеґріні з вопросів народностных меншын.

Зробив так день по стрічі, котру Форро абсолвав в Презідентьскім палаці з Міланом Яном Піліпом, председом Палаты народностных меншын Рады влады Словацькой републікы про народностны меншын.

„Бісідовали сьме о актуалній сітуації народностных комуніт, о вызвах, котры мають перед собов, і о можливостях, як їх рішыти,“ пише далше радник презідента. За його словами не обышли ани тему вольбы директора Фонду на підпору културы народностных меншын.

„Платить простый прінціп: О нас не може быти без нас. В демократічнім світі є неприятельным, жебы о людях вырішовало ся без їх участи і голосу,“ закінчів Форро.

Як інформовав нашу редакцію Мілан Ян Піліп, котрый є членом меншыновой рады за русиньску народностну меншыну, на тій стрічі ся як новозовленый председа Палаты народностных меншын доїднав із Крістіаном Форро на посліднім засіданю Рады влады Словацькой републікы про народностны меншыны, котре одбыло ся на кінцю юна того року.

Форро, котрого презідент Пеллеґріні выменовав за свого радника про народностны меншыны в місяці май, на засіданю втогды взяв участь.

„Добісідовали сьме ся втогды, же ся стрітиме, і даякым способом наставиме комунікацію меджі Радов влады, респектівно Палатов народностных меншын, але і межі нашов – русиньсков народностнов меншынов, і Канцеларійов презідента Словацькой републікы,“ повів Піліп.

„З паном Форро бісідовали сьме і о можливости зорґанізованя даякого округлого стола представителів народностных меншын і його уряду. Пан радник ня інформовав на нашій стрічі, же уж ся стрітив, а і далше буде стрічати ся з представителями окремых меншын. Хоче з меншынами зробити собі контакты, в уряді є курто.“

Як далше інформовав Мілан Ян Піліп, почас стрічі радник презідента інтересовав ся Русинами, як і вопросом проблемы Русинів а такзваных „Русинів-Українців“, што му председа Палаты народностных меншын пояснив.

Піліп потвердив, же обговорили і пробематіку Фонду на підпору културы народностных меншын, а не бісідовали лем о недавній вольбі нового директора. В справі вольбы директора Форро хоче почекати на становиско ґенералного прокуратора, кедже до нього в тім ділі были загнаны дві поданя. Далше подля Піліпа бісідовали о общіх проблемах меншыного фонду, котры бы треба было рішыти векшов новелізаційов закона.

Піліп вірить, же Крістіан Форро буде і в будучности брати участь на засіданях Рады влады Словацькой републікы про народностны меншыны, а тіснішы контакты буде утримовати і з русиньсков меншынов.

Корпус радників презідента Словацькой републікы Петра Пеллеґріні розшырив ся о радника про народностны комуніты в маю. Крістіан Форро у тій функції на кінцю юна зорґанізовав округлый стіл, на котрім брали участь представителі народностных меншын і презідент.