Радник словацького презідента про народностны комуніты резіґновав

Радник презідента Словацькой републікы Петра Пеллеґірні про народностны комуніты Крістіан Форро у віторок 23-го децембра 2025-го року подав резіґнацію. Інформoвала о тім аґентура TASR. Форро о тім перед тым написав на соціалній сіті.

Пеллеґріні Крістіана Форро до функції радника по справах меншын выменовав 20-го мая 2024-го року, нецілый рік по наступліню на посаду презідента. Форро так у функції быв лем дашто веце як рік і пів.

Не міг єм зробити іншак

„По днешнім рішіню єм ани не міг зробити іншак. Днесь єм панови презідентови подав свою резіґнацію на функцію радника про народностны комуніты. Про мене публічна служба приятельна є лем втогды, покля при вшыткых обставинах є в згоді із моїма прінціпами – правнов певностьов, почливостьов і достойностьов нашой комуніты,“ написав Форро, котрый в минулости быв председом партії Magyar Szövetség – Maďarská aliancia, і в році 2024 кандідовав на презідента Словацькой републікы.

Додав, же в роботі не перестане, і далше буде одкрыто і дослідно стояти при Мадярах, котры жыють на Словакії, як і при вшыткых народностных комунітах.

Як інформовала аґентуру TASR говоркыня презідента Патріція Медведь Мацікова, голова державы взяв рішіня Крістіана Форро до відома і подяковав му за співпрацу.

Презідент підписав новелізацію Карного кодексу

Презідент Пеллеґріні підписав 23-го децембра новелізацію Карного кодексу. Хоць наперед бісідовав, же при новелізації може схоснує право вета, днесь інформовав, же закон підпише у верзії, в якім го схвалила Народна рада Словацькой републікы.

Петер Пеллеґріні твердить, же за верзію новелізації і тото рішіня повну одповідность несе влада, котра была згодна із таков пропозіційов, і парламентна векшына, котра го схвалила.

Форро уж в минулости інформовав, же презідента пожадав о непідписаня новелізації. Вказав на часть, котра дотулять ся Бенешовых декретів. Новый Карный кодекс запроваджать карну одповідность за заперечаня або спохыбньованя повойновых документів ку упорядкованю обставин по Другій світовій войні на Словакії.

„Хто публічно заперечать або спохыбнює мірне упорядкованя обставин по Другій світовій войні, яке выникло на основі правных актів репрезентатівных орґанів Чехословацькой републікы або Словацькой народной рады, покарать позбавліньом слободы аж на шість місяців,“ пише ся в новелізованім Карнім кодексі.

Подля презідента новелізаційов і даным заказом не може быти доткнуте право боронити ся суднов путьов проти конфішкації маєтку.

„Але не припущам, жебы хтось цілено на трібунах бунтовав якусь гражданьску неспокійность лем тым, же буде спохыбньовати історічны дії,“ выголосив Пеллеґріні в рамках арґументації підписаня новелізації.

Проблемы із  Бенешовыма декретами

Покля в тім припаді бісідуєме о Бенешовых декретах і Мадярах, на думці суть конкретно тоты, на основі якых по Другій світовой войні конфішковали ся маєткы Мадярам, Німцям і колаборантам, якы пак были высельованы із теріторії Чехословакії. Робило ся так на основі колектівной вины.

Конфішкація так великого множества фундушів ся не зреалізовала комплетно. Маєткы, котры не были реално сконфішкованы, могли пак і гражданы мадярьской народности рештітуовати.

Бенешовы декреты зістали частьов правного порядку Словацькой републікы, котра выникла у 1993-ім році, но аналіза із 2002-го року, яку зробило втогды Міністерство справедливости, пише, же платность декретів є безпохыбна, але приятьом Листины основных людьскых прав і слобод ся найпізніше 31-го децембра 1991-го року зрушыла ефектівность Бенешовых декретів у правнім порядку.

Значіть, же тото, што было сконфішковане, є сконфішковане і пошкоджены на то не мають веце право, але теперь або в будучности нихто уж не може вывластнити когось маєток на основі Бенешовых декретів.

Председа мімопарламентной Magyar Szövetség – Ласло Ґубік, уж в літі робив пресконференцію із назвов Стоп Бенеш, де вказав на факты, же Словацькый фонд фундушів і далше хоснує Бенешовы декреты на вывластніня фундушів. Звернув втогды увагу на то, же наприклад при будованю автострады D4 о свій нерухомый маєток пришло приблизно 250 людей (вартость в міліонах евр).

Єден із словацькых денників при тій темі написав, же Словацькый фонд фундушів якбач уж од року 2018, но із выразнов інтензітов у 2025-ім році, почав конфішковати великы пріватны фундушы. Тему собі присвоїв найміцнішый опозічный субєкт Progresívne Slovensko.

Одповідьов владных партій Smer-SD, Hlas-SD i SNS было приятя новелізації карного кодексу, в котрім за заперечаня або спохыбньованя повойновых документів ку упорядкованю обставин по Другій світовій войні на Словакії грозить піврічный арешт. За дану тему проґресівців крітіковали і дакотры опозічны партії. Новелізація была прията в скороченім леґіслатівнім процесі.

Партія Magyar Szövetség вдяка приятю новелізації Карного кодексу брала участь на послідніх противладных опозічных протестах в децембрі, причім дотеперь были представителі той партії скоріше провладны і пропрезідентьскы.

Фото: FB/Forró Krisztián.