Радоцина по ремонтах. Покля што без трасы в коренях дерев

В Радоцині закінчыли перебудову місцевого готелю і, як бесідує надлісничый Юзеф Леґутко, тепер є то доцяп інчый стандард. На разі не буде єднак плянуваной спацеровой трасы в коренях дерев.

Ремонт Школіньово-Выпочынкового Осередка «Радоцина» зачал ся в 2018 році. Адміністрацийні будинок находит ся на обшыри шолтыства Чорне, а по правді – на обшыри бывшого села Радоцина. Через рокы было то місце, де мож было релятивні туньо переспати ся під дахом і на постели (туристична шатрова база находит ся парудесят метрів дале) та зісти перогы ци кобасу і дашто ся напити в пригостельовым барі. Тепер вельо ся змінило.

Новы місця до спаня, новы стежкы, новы рекреацийны обшыри

«Перебудова і выпосажыня осередка є дефінітивні закінчене, надлісництво підписало догваріня на свідчыня ґастрономічных услуг зо знаном ґорлицком фіром, тепер лем треба ждати, аж вернут ограничыня звязаны з коронавірусом» –
бесідує Юзеф Леґутко, надлісничый Надлісництва Ґорлиці. В будинку вельо позміняли. Зліквідували вельоособовы покоі, заадаптували під (є гын тепер єденадцет 2-3-особовых ізб з лазничками), добудували конференцийну салю. Окрем того вымінили выгляды, двері, отеплили стіны, дотеплили дилины і повалу, поінсталювали солярны панелі.

В найблизшых трьох роках в сусідстві Надлісництво хоче вознести дальшых 11 обєктів, котры хоснуваны будут до рекреацийных ціли та до наукы природы для вшыткых.

В лютым/фебруарі тр. в Надлісництві підписали догваріня на дофінансуваня задачы «Екопарк – Радоцина – еколоґічна едукация на основі зрівноваженой лісовой господаркы». В рамках задачы перебудуют господарчый будинок на модерный вельофункцийный конференцийно-выставовый будинок, а обєкт бывшой аґреґаторні заадаптуют на мультімедияльный інформацийный будинок.

За ріком, Вислоком, зроблят едукацийно-інтеґрацийну стрефу з задашыньом-шопом в стили лемкіской хыжы. Буде то місце до промуваня дерева і того, як може быти хоснуване в формі еколоґічного будовляного материялу.

В сусідстві хотят зробити іщы інтерактивный парк з чысленныма темовыма стежками і атракциями для наймолодшых. Задачу хотят зреалізувати до кінця 2023 рока, а плянуваный кошт до близко 7,5 млн зл.

Не в коренях дерев, а традицийныма стежками

Є в Радоцині єдна убіч, котра одкрыват коріня дерев, систему верств землі. Надлісництво выдумало зорґанізувати гын спацерову стежку. Корытар мал чыслити парудесят метрів. Мал, бо з пляну треба было зрезиґнувати.

Надлісництво Ґорлиці зложыло в 2019 році внесок до Нацийонального Фонду Охороны Середовиска о дофінансуваня проєкту, котрый обнимат, окрем вельох інчых ініциятив, зорґанізуваня спомненой стежкы. З огляду на ограничены середкы Фонду, внесок треба было зверифікувати і зрезиґнували з трасы в коренях дерев.

«То не так, же лишыли сме тоты пляны на все. Просто треба іх одложыти в часі. Маме розмаіты трансграничны проґрамы. Може в рамках котрисого поведе ся зреалізувати стежку» – бесідує Ю. Леґутко.

На тот момент будут реалізувати інчы інвестициі, м.ін. штырі (заперты в формі колеса) трасы довкола терену осередка. В сумі 25 км, якых мож перейти піше, переіхати ровером, а зимом – на лыжах до літаня.