Ромы апелюют до премєра. В Польщы насиляют ся ксенофобічны поставы

Стоваришыня Ромів в Польщы заапелювало до шефа уряду, Дональда Туска, о рішучый сиґнал власти, же в польскій державі неє призволіня на дискримінацию, расизм ци ксенофобію та же держава буде хоронила вшыткых громадян перед злочынами на ґрунті ненависти.

Контекст розосланого до медий апелю напряменого до премєра, то – як подал ведучый стоваришыня Роман Квятковскій – маршы о антиіміґрацийным характері в польскых містах та адресуваны до Ромів через сусідів остережыня, жебы не выходили з хыж з огляду на ризико напасти. В выступліню Квятковскій звернул ся до премєра «жебы підняти рішучы діяня в звязку з насиляючым ся чыслом нападів і ворожых атаків взглядом осіб о інчым кольорі скоры, нацийональности, языку і культурі».

«Маме свідоміст, же маршы о антиіміґрацийным характері, котры перешли польскыма містами, сут політичні хоснуваны. На жаль, по такых подіях дотерают до нас голосы, же Ромы сут остеріганы через сусідів, жебы не выходили на улиці з огляду на реальне ризико напасти і атмосферу загорозы» – написал ведучый Стоваришыня Ромів в Польщы.

Квятковскій зазначыл, же ґрупа тота хоче ся чути безпечні в своій державі, а задачом правоохоронных орґанів має быти «успішна охорона каждого чловека перед насильством і дискримінацийом».

Накликуваня до ненависти

Ведучый ромского стоваришыня потупил публичны выповіди політиків, котры «закликуют до ксенофобіі і баґателизуют єй соспільны наслідства». Прикликал при тым выповід єдного з лідерів Конфедерациі Кжыштофа Босака, за портальом OKO.press, же «треба плекати ксенофобію». Як підкрислил, такы слова перекладают ся на реальну загорозу і выкликуют крайні настроі в соспільстві. Припомнул, што згідні з Кодексом карным публичне накликуваня до ненависти на фоні нацийональных, етнічных ци расовых ріжниц є каране вязницьом до трьох років. Додал, што кажда форма дискримінациі, ксенофобіі і расизму вымагат рішучого протидіяня.

«Апелюєме о ясный і рішучый сиґнал зо страны власти, же в Польщы нее і не буде призволіня на дискримінацию, расизм ци ксенофобію та же держава консеквентні буде хоронила вшыткых громадян перед злочынами з ненависти і карала тых, котры такы захованя похваляют або підбурюют до такого захованя» – написал Квятковскій.

Застерюг, же лем спільна, рішуча постава власти, державных служб і соспільства «може привернути почутя безпекы і гідности каждому мешканцьови нашой державы».

Ректоры шлезскых учелен занепокоєны насиляючом ворогістю взглядом міґрантів

Выступліня Квятковского єст уж черговым соспільным актом противу взглядом дискримінациі по суботніх антиіміґрансткых демонстрациях, якы перешли містами Польщы і котры фірмуваны были політиками Конфедерациі. В понедільок 21. липця/юлия ректоры шестьох учелен зо шлезского воєвідства оприлюднили спільный апель, в котрым помістили занепокоіня насиляючом ся ворожістю взглядом міґрантів. Звернули увагу, што призволіня на язык ненависти може одберати почутя безпекы леґальным студентам і працівникам.

Спротив взглядом насиляючых ся ксенофобічных постав і аґресиі взглядом міґрантів высловили тіж шлезскій воєвода Анна Жабска, представникы самоуряду воєвідства і президенты нейвекшых міст нижньошлезского воєвідства.