Ропа просит молодых до проєкту «Будучніст повязана з минулым»

Ґміна Ропа, яка своім обсягом обнимат невелику част середньой Лемковины, рыхтує акцию про наймолодшых жытелів. Ґмінний Осередок Культуры в Ропі в своім проєкті пн. «Будучніст повязана з минулым», шырше направленым на молодых мешканців ґорлицкого повіту, дає ограниченому чыслу участників (24 особы) можніст активно выкорыстати свобідний час, а тіж вывчыти інтересуючы річы.

Серед варштатів, якы будут реалізуваны в рамках того проєкту, находят ся і такы, што звязаны сут з лемківском культуром – іх темом мают быти лемківскы орнаменты і гафт. Окрем того орґанізуваны будут прогулькы до скансену в Шымбарку та Мазярской Загороды в Лоси, значыт місц, де презентує ся материяльну спадковину Русинів.

Кєд сте заінересуваны участю в проєкті, то мате іщы три дни, жебы ся зголосити, бо записы тырвают од 1. до 16. червця/юнія т.р. Про деталі чытайте долов на афішы.

Ґміна Ропа являт ся невеликым адміністрацийным простором в границях ґорлицкого повіту. В єй склад входят лем три села, з того два сут етнічні лемківскы. Окрем польской Ропы до ґміны приналежат Климківка і Лося. До выгнаня Климківка находила ся на місци днешнього штучного озера, одтамаль тіж неґрамотні перенесено мурувану церков з 1914 рока. Iщы перед 1947 роком Ропа была селом, в котрым переважало польскє населіня, хоц і там прожывали поєдны рускы родины. «Шематизм Грекокатолицкого Духовеньства Апостольской Адміністрациі Лемковины» за 1936 рік подає, же в парохіі Климківка і дочырніх Лоси та Ропі было 1550 рускых душ. Зас в Лоси, єдиным днес селі в ґміні Ропа, де правлены сут службы за східнім обрядом, находит ся фунґуюча грекокатолицка парохія Рождества Пресвятой Богородиці. Атракцийом села є спомянута Мазярска Загорода – єдина така в Польщы.