Русиньскы експонаты будуть мати діґіталны копії. Діґіталізує ся і на Підкарпатю

Експонаты Крайского музея в Пряшові і Словацького народного музея – Музея русиньской културы в Пряшові, як і двох партнерьскых музеїв в Закарпатьскій области Україны, здобывають свою діґіталну подобу.

Як пише аґентура TASR, вдяка меджінародному проєкту під назвов Віртуалны културны музеї, котрый реалізує Аґентура реґіоналного розвитку Пряшівского самосправного краю в співпраці з україньсков мімовладнов орґанізаційов Go Better Life, поступно выникають діґіталны копії довєдна 400 збірковых предметів і 12-ох сакралных обєктів.

На Словакії было в рамках проєкту в двох споминаных пряшівскых музеях выбратых на діґіталізацію 200 меншых артефактів, і три великы історічны будовы – Палац Ракоція в Пряшові, каштелі в Стропкові і Ганушівцях, далше памятник князя Лабірця в Габурі, як і деревяны храмы в русиньскых селах Тополя і Кривый.

Діґіталізованы предметы будуть частями віртуалной переглядкы музеїв, і будуть доступны на вебсайті, котрый ся творить так само в рамках проєкту.

На проєкті беруть участь і словацькы технолоґічны фірмы. На вытворіня єдного 3D моделу потребують коло 1000 аж 2000 знимок. Хоснователі собі пак на вебсайті будуть годны модел обертати, приближыти детайлы, дістати ся на місця, котры іншак не суть доступны.

Партнеры проєкту із Україны попри меншых артефактах заміряли ся на сканованя шестьох вызначных будов на Підкарпатю. Хосновали при тім дроны, технікы алпіністів, жебы будовы нафотили зверьху і зблизка. Сістема, котру собі выбрали, уможнює точность до єдного центіметра. „Покля бы будова была зничена, архітекты єй докажуть зреконштруовати з максімалнов точностьов,“ повів Володимір Вашко із орґанізації Go Better Life.

Дотеперь приготовлены выступы проєкту были темов конференції, котра проходила в Пряшові в септембрі 2025-го року. Проєкт Віртуалны културны музеї є фінанцованый із проґраму Interreg VI-A NEXT Мадярьско-Словакія-Румунія-Україна 2021 – 2027. Европска унія на тот проєкт дала понад 172 тісяч евр.