Русины на выставі народной одежды і образів

Як інформовала аґентура Рутенпрес, в середу 25-го фебруара 2026-го року в Інштітуті про културу войводиньскых Словаків была одкрыта выстава народной одежды і вытварного уменя народностных комуніт Войводины.

Выстава є частьов меджінародного проєкту Interreg IPA Мадярьско – Сербія під назвов Граніця, котра нас капчать, на котрім вєдно співпрацовали од 2024-го року інштітуты про културу войводиньскых Мадярів, Русинів, Хорватів, Словаків і Румунів.

В рамках того вецерічного проєкту, якый закінчує ся якраз тов выставов, представлены были културны цінности реґіону, а так само укріпила ся співпраца меджі народностныма меншынами у Войводині, пише Рутенпрес.

На выставі пять народностных інштітутів про културу вказало народну одежду своїх народностных меншын, як і творы малярів на тему войводиньскы пейзажы.

Русины на выставі презентують святочну і робочу женьску одежду. Представив єй Саша Сабадош, директор Інштітуту про културу войводиньскых Русинів. Так само Русины выставлюють образы Владиміра Дороґзахія.

На одкрытю выставы, яков закінчує ся меджінародный проєкт, участный быв підпредсидатель влады Автономной покраїны Войводина Томіслав Жіґманов, асістент покраїньского секретаря про културу, публічне інформованя і односины із реліґійныма комунітами Золтан Кудлик, покраїньска омбудсманка Драґана Чоріч, предсидателька Націоналного совіту Словаків Душанка Петрак, директорка Колеґії Европа Ілдіко Шнейдер Шара, як і директоры окремых меншыновых інштітутів про културу.

Выставу мож видіти в Новім Саді в просторах Заводу про културу войводиньскых Словаків до кінця марца того року.

Фото: Рутенпрес.