Русины в Мадярьску реаґують на Кравченка

Представителі Русинів в Мадярьску – Віра Ґіріц, посланкыня Русинів в мадярьскім парламенті і Віктор Крамаренко, председа Вседержавного русиньского самосправованя, офіціалным комуніке зареаґовали на слова председы Вседержавного україньского самосправованя в Мадярьску – Юрія Кравченка, котрый зачатком юлія на конферецнії в Будапешті перед журналістами із Підкарпатя говорив, же у Русинів в Мадярьку чує вплив Росії, і же суть фінанцованы Москвов. Далше были на пресконференції высловлены думкы, котры спохыбнюють екзістенцію Русинів.

„Як представителі русиньской громады Мадярьска выражаєме побуреня і протест, і ініціюєме приятя потрібных дій. На основі Конштітуції Мадярьска і цілой їй леґіслатівной сістемы кажда народность має право на екзістованя як етнічна громада. Русиньскый народ має неоднятне право на всокочіня і розвиток народной ідентічности громады, історічных традіцій, материньского языка, збогачованя духовной културы,“ пише ся в комуніке, котре было публіковане на офіціалнім сайті Вседержавного русиньского самосправованя в Мадярьску.

„Дізнали сьме ся, і маєме жрідла інформацій, же 7-го юнія 2017-го року у Будапешті Любов Непоп, надзвычайный і повномочный посол Україны в Мадярьску, і Юрій Кравченко, председа Вседержавного україньского самосправованя, стрітили ся із підкарпатьскыма новинарями. То, што прозвучало на конференції, зпохыбнює о екзістенцію русиньского народа, його материньского языка, многолітніх традіцій, історічной минулости. На потверджіня нашого выголошіня мы опубліковали матеріалы з пресконференції, протовмачены на мадярьскый язык і коментарі на них, електронічну адресу жрідла, оріґіналный текст конференції і писмо председы Вседержавного русиньского самосправованя Віктора Крамаренка і посланкыні Русинів в мадярьскім парламенті Віры Ґіріц председови Всеедржавного українського самосправованя Юрійови Кравченкови на нашім сайті www.ruszin.com,“ закінчує ся офіціалне комуніке.

Припоминаме, же 14-го юнія была на сайті Mukachevo.net публікована статя „Юрій Кравченко: Українське самоврядування в Угорщині має прекрасні відносини з аналогічним русинським самоврядуванням,“ котра принесла інформації о тім, што председа україньского самосправованя говорив о Русинах за участи Любов Непоп в рамках пресконференції. О кавзі на нашім сайті найдете і коментарь під назвов Добра рада. Запис із пресконференції можете посмотрити собі за тым мотузком. Перепис найдете ту.

Фотоґрафія: Юрій Кравченко, жрідло: www.mukachevo.net.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА