«Щыро доношу. Судиме ся!» – понедільок, 20.00 год.

Шановны радийослухачы, зачынаме четверту серию проґраму «Щыро доношу». Проґраму, котрий операт ся на правдивых істориях, якы тыкали лемківской соспільности. Четверта серия буде особливом…

Щыро доношу, што тота серия не буде презентувала поліцийных рапортів про жытя лемківского населіня в меджевоєнным періоді (тото было змістом першой і другой серий), не будут то тіж збійницкы судовы справы сперед парусот років (тым занимали сме ся в третій сериі). Четверта серия буде про тото, чым актуальні люблят занимати ся денекотры Лемкы (і ні, не буде нич про гуляня, співаня і печыня кобасок), а по правді то Лемкыні, а так властиві то єдна Лемкыня – суджыньом ся. На разі займеме ся выміром справедливости сперед 100 років. Будут то головні обычайовы справы, часом назначены кримінальныма приметами, якы вкажут реляциі і односины в лемківскым соспільстві в передвоєнным періоді.

Даколи певно дойдеме і до тых сучасных справ. Зо специяльном дедикацийом для єдной пані, што любит правників зміняти.

Най вам піде на здоровля!

Презентуваны справы, з огляду на свій обсяг, ділены будут на части. Днес перша з трьох (дальшы презентуваны будут в наступных тыжнях) в справі про зневагу священника…

Премєра – понедільок о 20.00 год., повторіня о 4.00 год. вночы з понеділька на віторок та о 13.00 год. в найблизшу суботу.