СКР выбрав свою раду і председу на далшый період. Далшый буде в Мадярьску

В суботу 14-го юна 2025-го року продовжовав XVIII. Світовый конґрес Русинів у Бухаресті своїм другым пленарным засіданьом. Делеґаты схвалили склад Світовой рады Русинів і выбрали председу на далшый дворічный період.

Друге пленране засіданя почало діскусійов, до котрой приголосили ся делеґаты і гості. Одкрыв ся вопрос выбераня председы Світогового конґресу Русинів, а так само членьскых орґанізацій.

Ку штатуту выникне комісія

В рамках діскуії рішыло ся, жебы змінити Штатут СКР так, жебы кандідовати на председу міг каждый делеґат, не лем членове, котры были выбраты до Світовой рады Русинів. Так само одкрыв ся вопрос того, ці мож за членьскы орґанізації принимати з окремых держав і новы общества або інштітуції, котры суть актівны в русиньскім русі.

Што до приниманя новых членів, председа СКР Штефан Лявинець припомянув, же якраз за тым цільом было в попередній зміні штатуту запроваджене асоціоване членство, в рамках котрого дана орґанізація підписує меморандум о співпраці з СКР.

Проблемов є то, же асоціованы членове не мають делеґатів, ани право голосовати на конґресі. Рекомендоване зато было, жебы членьска орґанізація складала делеґацію наприклад і так, жебы асоціованы членове мали представителя в делеґації на засіданю СКР.

Односно рішіня вопросу, ці може кандідовати на председу Світового конґресу Русинів будькотрый делеґат засіданя, або лишыть ся дотеперішня сістема, же кандідовати може лем член Світовой рады Русинів, делеґаты на пропозіцію Штефана Лявинця заголосовали, же выникне комісія ку Шатуту СКР, котра можливы зміны приготовить на слідуюче засіданя конґресу.

Засідали конґресовы комісії

В рамках другого пленарного засіданя засідали і окремы конґресовы комісії. При СКР діє пять комісій, до складу котрых номінують своїх представителів окремы делеґації. Своє засіданя мала в суботу Комісія про освіту і язык, Комісія про културу, Комісія про історію, Комісія про масмедії і выдавательство, а Комісія про турістіку і ґранты.

Председове комісій пак поінформовали делеґатів о темах, котры ся обговорили, і планах, котры бы хотіли зреалізовати в далшім дворічнім меджіконґресовым періоді.

Світова рада з двома змінами

Делеґації за окремы членьскы державы в рамках другуго пленарного засіданя СКР выбрали собі своїх представителів до складу Світовой рады Русинів – выконного орґану СКР в меджіконґресовім періоді.

Світова рада Русинів на далшы два рокы буде діяти в складі Михайло Фейса за Сербію, Микола Бобинець за Україну, Мартін Караш за Словакію, Штефан Лявинець за Мадярьско, Андрій Трохановскый за Польщу, Ґеорґій Фірцак за Румунію, Ян Чопік за Чеську републіку, Любомір Медєші за Северну Америку (США і Канада), Мійо Шайтош за Хорватію, і Светлана Бойчук за Світовый форум русиньской молодежи.

Бойчук была на пятніцьовім засіданю форуму потверджена на далшый дворічный період у функції предсидателькы, зато автоматічно є і членом Світовой рады Русинів.

Рада буде в далшім періоді діяти з двома персоналныма змінами. Новыма членами Світовой рады Русинів стали Любомір Медєші і Ян Чопік, котры вычеряли Джіма Кепчара-Каміньского і Юрка Капаца.

Председом Лявинець, далшый конґрес в Мадярьску

По тім, як делеґаты выбрали Світову раду Русинів, членове одышли на своє перше засіданя. По засіданю далшы процесы, аж до зволіня председы СКР, рядив честный председа конґресу Павел Роберт Маґочій.

Маґочій дав делеґатам схвалити склад Ревізійной комісії СКР, котрый вышов із пропозіцій делеґатів. Так само оголосив, же Світова рада Русинів номіновала на председу СКР Штефана Лявинця, іншый кандідат ся не приголосив. За підпредседу рады собі членове схвалили Ґеорґія Фірцака. Делеґаты были інформованы, же орґанізовати далшый конґрес має інтерес членьска орґанізація з Мадярьска. Тота кандідатура была голосованьом схвалена, значіть XIX. Світовый конґрес Русинів одбуде ся в Мадярьску.

Пак вже проходили вольбы председы СКР. Голосованя, і кедь быв лем єден кандідат, было тайне. Розданых было 83 листків на голосованя. Резултаты тайной вольбы выголосив голова волебной комісії Мірон Крайковіч.

Голосовало 82 делеґатів, 2 голосы были неплатны, 9 голосів было проти Штефаня Лявинця і 71 делеґатів голосовало за нього. Ляцинець буде продовжовати на посаді председы далшы два рокы. Делеґаты пак потвердили на далшый період секретаря СКР Володиміра Противняка і прес-секретаря Петра Медвідя.

На кінцю делеґаты XVIII. Світового конґресу прияли резолуцію і узнесіня. В резолуції СКР знова суть пункты, котры дотуляють ся вызнаня Русинів на Україні, і ґарантованя їх прав. Конґрес так само жадать, жебы Полща вызнала такзвану Акцію Вісла, в рамках котрой были насилно выселены Русины з Лемковины, за незаконну.