Словакія офіціално вызнала далшу народностну меншыну
Вєтнамці стали 14-ов офіціално признанов меншынов.
Вєтнамска комуніта стала 14-ов офіціално вызнанов народностнов меншынов на Словакії. Уділіня шатуту народностной меншыны схвалила влада Словацькой републікы почас свого засіданя в середу 7-го юна 2023-го року.
Владный кабінет при своїм вырішованю о тім ділі выходив з рекомендації Рады влады Словацькой републікы про людьскы права, народностны меншыны і родову рівность, котра рекомендовала вызнаня на основі фахового становиска Інштітуту етнолоґії і соціалной антрополоґії Словацькой академії наук.
Авторы того матеріалу признавають леґітімность і релевантность жадости вєтнамской комуніты. „Сповнює крітерії чісленности, на Словакії жыє уж майже 70 років, і в сучасности є етаблована третя ґенерація, котра є повно інтеґрована,“ пише ся в становиску.
Кедьже на Словакії не існує формална сістема офіціалного вызнаня народностной меншыны, Вєтнамці ся меджі офіціално вызнаны народностны меншыны прияли узнесіньом влады о тім, же їх представитель буде членом Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.
Подобный способ практіковав ся у 2010-ім році, коли были до ґрупы офіціално вызнаных народностных меншын на Словакії прияты Сербы.
В остатнім списованю жытелів із 2021-го року ся ку вєтнамскій народности на Словакії приголосило 2 793 людей, 489 собі єй дало як далшу народность.
Жадость на Міністерство справедливости Словацькой републікы адресовали і представителі ґуральской комуніты, котры бы так само хотіли быти вызнаны за окрему народностну меншыну.
Хоць офіціално не были публікованы даны о тім, кілько людей приголосило ся ку Ґуралям у списованю з 2021-го року, за нашыма інформаціями то было коло 5000 людей.
Вєтнамска меншына прибыла ку 13-ом меншынам, котры были вызнаны дотеперь, ку мадярьскій, ромскій, русиньскій, німецькій, російскій, сербскій, україньскій, булгарьскій, жыдівскій, моравскій, чеській, хорватьскій і польскій.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
