«Слово» – 13-та неділя по Сошествії Святого Духа – неділя, 9.00 год.

Ісус Хрістос своїм образным прикладом о чоловікови господарьови і робітниках у винограді хотів указати на велику Божу любов і його старостливость о чоловіка, а з другого боку одповідь чоловіка.

Чоловік господарь высадив виноград, обгородив його, збудовав вежу, преш на вино, передав робітникам і одышов. Так Господь по сотворіню вшыткого приготовив перекрасну загороду рая а умістив там чоловіка. Дав заповідь, котра была легоньков. Она мала выпробовати, ці чоловік признать свойов послухняностьов над собов авторіту Бога.

Подобно ся Бог старав о выбраный народ в його історії, ці в Еґіпті почас ран, котры не засягли выбраный народ, ці через путованя по пустыні, або в часі перебываня в обіцяній землі. Дав їм вшытко потрібне, і ку тому заповіді, котры мали быти як доказ любви ку Богу.

Но так, як робітникы не приїмали рабів, котры были посланы прияти частку із плодів, так першы люди не сохранили так легоньку заповідь, так і выбраный народ не приїмав рабів – то є пророків, котрых люблячій Господь посылав.

Робітникы ся дали звести фалшывій думці, же не потребують над собов никого. Так і выбраный народ увірив злому, убивав пророків а наконець і самого Сына.

Но тото слово є адресоване і ку нам. Жывот каждого є такым виноградом, котрый Господь Бог так старостливо із великой любви приготовив. Дав вшытко потрібне на досягнутя вічного ціля – спасіня душі і вічного блаженства. Дав нам заповіді, котрыма має доказати нашу любов і наше признаня авторіты Бога над собов.

Но діавол приступує а нашептавать – маш словобу, не слухай никого, ты можеш быти Богом. Не потребуєш мати над собов. Но Бог нам дав великый дар, як того посла – нашу совість. Котра нам напоминать: тото не роб, того ся хрань, того уникай. Тото роб.

Але діавол указує гріх, страсти роскошы, як дашто приємне, привабливе. А тым, же послухаме много раз діавола, сьме і мы подобны тым робітникам, котры убивали тых рабів. А мы убиваме нашу совість.

Но памятайме і на конець днешнього образного прикладу: Што зробить пан винограду тым підлым робітникам – злых з гнівом убє. І мы раз будеме давати рахунок із нашого жывота. Прото, коли нам тот образный приклад указує велику Божу любов і старостливость о нас.

Одповідайме нашов любвов ку Богу і ближньому, дотримованьом Його заповідей а не невдячностьов, як то робили підлы робітникы. Слава Ісусу Хрісту!

В неділю, 11. септембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. септембра о 12.00 год. і 12. септембра о 2.00 год. за русиньскым часом.