«Слово» – 13-та неділя по Сошествії Святого Духа – неділя, 9.00 год.

В слові днешнього Євагелія нам Господь наш Ісус Хрістос говорить образный приклад о робітниках у винограді. Говорить о чоловікови господарьови, котрый высадив виноград, обгородив, выбудовав преш на вино, поставив вежу на дозераня перед неприятелями.

А коли вшытко стратостливо приготовив, тогды передав робітникам, з котрыма зробив доїднаня, же будуть йому давати частку плодів. А сам одышов. Звірив їм свій маєток, довіряв їм. Но робітникы перевзявши виноград, зачали намагати ся, а як приніс першы плоды і Господарь послав рабів, они не прияли їх доброжычливо, як належало прияти послів од свого Госодаря. Но єдных высміяли, другых убили, далшых побили камінями.

Господарь послав далшых, зробили з нима тото саме. Наконець по довгім часі посыланя рабів без успіха посылать свого сына. Та сі повів: Мого сына ся будуть ганьбити, будуть мати решпект і почливость ку ньому, як ку сынови самого Господаря. Але не было так. Як го збачіли, повіли: То наслидник, убийме го, вшытко буде наше. Так і зробили. А наконець приходить сам господарь, підлых із гнівом убє а виноград дасть іншым.

Што стало ся, же тоты робітникы ся так змінили, порушыли доїднаня а дошли аж до убивства? Они зазнали єдну страту в їх жывоті. А яку? Стратили усвідомліня, же суть наємниками. Же они мали доїднаня передавати господарьови частку з плодів. А зачали собі привластньовати виноград. Стратили то усвідомліня, же мають когось над собов. А пропали тій пышній думці: мы сі уж робиме, не мусиме давати частку, тадь є то наше. А не заставило їх ани то, же пришов сам сын маїтеля. Но коли пришов сам Господарь, їх конець бых страшный.

Дорогы радіослухачі, тото слово указує нам на історію Старого завіта, на Божу старостливость о выбраный народ. Як Бог на їх бунт одповідать посыланьом пророків, котры їм припоминали доїднаня, котре выбраный народ прияв а согласно ся высловив, так будеме робити. Але скоро забыв, стратив тото усвідомліня, же належать Богу, же Він є над нима. Поставили сі злате теля, котрому ся кланяли, а наконець дошли до убивства самого Сына Господаря винограду. А наслідок быв про них страшный.

Но тото слово односить ся і ку нам, ку новому Ізраїлю. Памятайме, же Господь є над нами. Не дайме ся звести тому покушіню злого. Ты собі роб, што хочеш. Не дай ся никым обмеджовати. Бо наслідкы такого їднаня можуть быти страшны про земный жывот і про цілу вічность. Слава Ісусу Хрісту!

В неділю, 7. септембра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. септембра 2025 р. о 12.00 год. і 8. септембра 2025 р. о 2.00 год. за русиньскым часом.