«Слово» – 19-та неділя по Сошествії Святого Духа – неділя, 9.00 год.

Днешнє слово Євангелія можеме назвати драбинов любви. Наперд говорить: Што хочете, жебы люде робили вам, робте і вы їм. Уж тот найнизшый ступінь говорить нам о любви ку ближньому.

Так, як мы не хочеме, жебы нам люде робили зло, жебы нам шкодили, огваряли, посзджовали ці одсуджовали, выхосновали про себе. Так, коли сьме в такім покушіню тото робити ближнім, подудайме тоды на тото слово. Як мі бы было, кебы ся тото робили мі. Кедь бы сьме прияли тоту Ісусову пораду а жыли подля того слова, хоць і тото ся нам многораз видить тажкым, як бы ся змінив жывот в нашім оточіню ці родины, одношіню з колеґами в роботі, в парохії, селі, місті ці државі і на цілім світі.

Но Ісус і де дале і говорить. Коли робите добро, коли любите, коли жычате… тым котры так ставляють ся ку вам, яку одміну затото чекате. Тадь так роблять і грішникы. То значіть коли і не робиме зло, коли робиме і добро, але обмеджуєме лем на тых, од котрых очекуєме, же так само будуть обходити ся з нами. Або робиме добро другым, жебы нам самым мати якыйсь хосен, тоды сьме іщі лем на рівні поганів і грішників. Єто то любов ку ближньому основана через погляд власного еґа. Іншыма словами – самолюбство. Ближнього видиме через себе. Што із того капне про мене.

Но Ісус нас піднимать высше і говорить: Но вы любте своїх неприятелів, робте добро, жычайте без огляду на то, ці ся мі то верне. Або ці мі тот ближній робить добро або зло. Ці ня любить або ненавидить. Тому учіть і Апостол Павел: Коли твій неприятель є голодный, накорм го; як є затлітый, напой го; як є в потребі подай йому руку помочі. Но повіме сі, тото є тажке, тото ся противить нашому еґу.

Но тото є хрістіаньска любов. Прото Ісус іде далше а указує на приклад любви самого Бога, котрый любить каждого, давать выходити сонцю на добрых і планых і посылать додж на спаведливых і несправедливых. А Ісус обіцять і одміну, котра перевышує вшытко: Будете сынами Найвысшого.

Што може быти красше, радостніше, як то, коли сам Владыка неба і землі признать ся ку нам перед вшыткыма ангелами і повість: тото є моя люба дітина. Якой почливости ся нам дістане. Так нас днешнє слово помаленькы выводить до высот хрістіяньской доконалости в любви. Наперед од неробіня зла ближньому, через піднятя понад самолюбство ку правдивій жертвеній любви ближнього а обіцянкі быти дітинов самого Бога. Слава Ісусу Хрісту!

В неділю, 3. новембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. новембра 2024 р. о 12.00 год. і 4. новембра 2024 р. о 2.00 год. за русиньскым часом.