«Слово» – 19-та неділя по Сошетствії Святого Духа – неділя, 9.00 год.

Днешня статя з євангелія нам подавать правила поводжіня хрістіана. Ісус говорить, як хочете жебы люди робили вам, робте і вы їм. Поступно нас веде высше ку хрістіаньскій досконалости. Далше говорить: Кідь любите, або робите добро, або жычате лем тым, што вас люблять – яку одміну за то чекате, тадь так роблять і грішникы. Но нас веде і высше і говорить: Любте своїх неприятелів, робте добрі, жычайте – і нич зато не чекайте. Любити того, хто любить нас, хто нам робить добро, то іщі якось звладаме, але тот, хто є ку нам неприятельскый, ненавидить нас, кладе нам „дерева під ногы“, повіме собі як ся то дасть? Ісус сам указує нам приклад своїм жывотом. А наконець з креста – Отче одпусть їм, бо не знають што роблять. А на закінчіня додавать – ваша одміна буде щіра, будете сынами Найвысшого. то є будете вєдно з ним в Його царьстві, вічній блажености. Як собі тото усвідомиме – тогды зрозумієме, же в любви перенести вшыткы пакости, злобу нашых неприятелів, ображаня – є ничім в порівнаню з тым, што Бог нам приготовив – належати до його Царьства. Суть то лем дві лепты, котры Бог пожадує од нас. А так то, жебы сьме не мали ниякых неприятелів, ани ся на тім світі не дасть. А окремішньо, кідь стараме ся жыти подля нашой віры, дотримуючі Божы заповіди, але основным є то, жебы мы не мали никого за неприятеля. Тото за помочі Божой благодати можеме. Слава Ісусу Хрісту!

В неділю, 30-го октобра 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30-го октобра о 12.00, 15.00, 20.00 год. і 31-го октобра о 2.00 год. за русиньскым часом.

Фото – Wikipedia.