«Слово» – 2-га неділя Великого посту – неділя, 9.00 год.

Пережыли сьме уж другый тыждень святого посту. Євангеліє днешньой неділі нам хоче повісти далшы важны слова, як добрі выхосновати тот спасителный час.

Ісус приходить до Капернаума. Там ся позбіговало вельо людей, як ся дочули, же є в домі. А так уж не было місця при дверях. А праві тогды приходить четверо людей несучі на постелі невладного, з віров, же Ісус його може выздравити. Не знаме, як довго тот чоловік так терпів. Але, коли пришли ку дому, виділи, же є заповненый, і не будуть мочі ся перепхати, а іщі із невладным ку Хрістови. Но они не падають на дусі. Їх віра, же Ісус го може выздравити, їх жене, жебы ся не вздавати.

Выношають го на стріху, зробили діру до повалы і помаленькы го спущають перед Ісуса. А кедь Ісус видів їх віру, говорить невладному: Одпущають ся ті твої гріхы. Но ани тоты, што го принесли, ани фарізеї і учітелі закона таку одповідь не чекали, а такой роздумовали у своїх сердцях, штот тото значіть? Хто може одпущати гріхы окрем єдиного Бога.

То мали правду, так повісти, лем не додумали далше, же сам Бог в людьскій природі стоїть перед нима і говорить такы слова. А Ісус познав їх думкы. Прото їм говорить, чом такы планы бісіды ведете в собі?

Ісус дав одповідь і тым четвером. Они чекали уздравліня а Ісус нич інше не робить, лем подавать йому здравя. Ісус видів як їх віру, так і важнішу хвороту того чоловіка – а то гріх. Прото наперед выдравлять душу, а аж пак тіло. Жебы і нам указав поступность – самоперше маме дбати о безсмертну душу, аж пак о тіло. Словами Ісус познав до глубкы о чім роздумують фарізеї і учітелі закона. Так Ісус познать і нашы сердця, нашы розположіня духа, коли приступуєме ку тайні покаяня. Ісус сам невидимо стоїть і приїмать нашы вызнаня, коли хочеме учути тоты радостны слова – одпущапть ся ті твої гріхы.

Памятайме, жебы сьме были в правді. Не глядали оправданя на свій гріх, і го не звальовали на свойого ближнього. Ісус познать до глубкы сердця каждого чоловіка. Най тота постна доба нам то поможе зрозуміти, але і вовести до жывота. Слава Ісусу Хрісту!

В неділю, 20. марца 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. марца о 12.00 год. і 21. марца о 2.00 год. за русиньскым часом.