«Слово» – 21-ша неділя по Сошествії Святого Духа – неділя, 9.00 год.

Ісус Хрістос говорить образный приклад о сіячови. Тот образный приклад быв знамый Його слухателям. А через то подавать глубоку науку. Вышов сіяч сіяти своє зерно. Хто є тот сіяч? Є то сам Хрістос, котрый вышов од Отця, пришов на землю, жебы сіяв своє слово.

В Старім завіті, коли пророкы говорили слово, засіали: так говорить Господь. Ісус говорить своє слово. А єдно пало на край дорогы, де його люде потоптали і небесны птахы выдзьобали. Друге на скланату землю, де взышло, но як сонце засвітило, спріло. Далше до терня, і выросло вєдно з терньом, но терня го задавило. А далше до доброй землі, котре принесло плоды.

Што нам говорить тот образный приклад, нам сам Господь пояснює. Земля суть людьскы душы і сердця. Най край дорогы – у тых, котры слово хоць выслухають не або без віры, або недбало, поверьхово, без інтересу доволити йому войти до сердця. Представлять тота земля тых, котры выслухають слово, но не зато, жебы ого прияти. Уж суть апріорі наставлены неґатівно ку тому слову. Єдны, жебы то слово высміяли, скртізовали, выхосновали як зброю проти Хріста.

Як то робили фарізеї або архієреї, котры выслухали слово на то, жебы го могли поїмати на слові. Або тых, котры лем поверьхово выслухають, ай ідуть до церьквіи, і може і дома, коли мати повість ідеме сі прочітати з Божого слова, выслухають бо мусять, але такой забывають, бо приходить діавол і краде то слово такой зо сердця, жебы не принесло плод.

На камяній землі, там хоць то слово было прияте з радостьов, наприклад чоловік чіта Писмо, ці жывоты святых, може і олаче над твердостьов у вірі мучеників, ходить до церькви, молить ся. Говорить Богу, гей, Господи іду до твого винограду робити. Но лем до часу, кои прийде якась біда – або страта маєтку через даяке нещастя, або страта близкой особы, або пронаслідованя. Уж постановліня вірности слабне, і цалком пропадать.

До терня – у тых, котры і выслухають тото слово, але старости і радости, роскошы жывота, задавлюють лово, і оставать без хосна.

В першім припаді было неґатівне наставліня ку тому слову – або без віры, або з цільом высміяти. Друга земля приїмать слово – але неґатівны сітуації жывота – ці страх з пронаслідованя, страты істот, ці якась біда – спрічінюють оодпаджіня од слова – і не принесе хосен, плод. Третя земля – терня – там зась з погляду чоловіка позітівны сітуації – спричінюють, же непринесе то слово плод. Лем четверта – котра з добрым і чістым серцьом приїмать слово – приношать плод в терпезлиости. Значіть: слухать уважно з добрым і чістым сердцьом, хранить то слово в серці, ани нич неґатівне ани нич позітівне не докаже то слово знищіти, так принесе плод свогого жывота в терпезливости.

Хто вытримать до кінця буде спасеный. Дайме собі і мы опрос, до котрой катеґорії, а котров земльов є теперь моя душа? Слава Ісусу Хрісту!

В неділю, 2. новембра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. новембра 2025 р. о 12.00 год. і 3. новембра 2025 р. о 2.00 год. за русиньскым часом.