«Слово» – 23-тя неділя по Сошествії Святого Духа – неділя, 9.00 год.

Слово днешньой неділі нам говорить о єднім словку, словко, котре є так часто подаване і в сучасній добі, але часто з іншым наміріньом. А то словко є слобода, або модерно лібералізм. Де чуєме тото словко?

Ісус выходить на берег, на пусте місце а там його стрічать чоловік опанпованый злыма духами. Його рекція, як увидів Ісуса, была – што мі і тобі, Ісусе, Сыну Найвысшого Бога. Што тоты слова значать нам давать поясніня уж початок Божого слова в книгі Бытія, де чуєме о жывоті в раю.

Бог давать чоловіку владу над сотворіньом. Но лем єдно маленьке обмеджіня давать, жебы чоловік сі усвідомив, же мать над собов Сотворителя, жебы із любви ку його слову радостно ся повиновав, послухав його заповідь. Но діавол приступує а говорить: люде, вы сьте в найвекшім нещастю, Бог вас тримать звязаных якбы ланцами, тота заповідь є ваша найвекша траґедія. Але коли мене послухате, тогды будете слободны. Будете слободны і од рабства підряджености Богу, бо самы будете богами, тадь уж не будете потребовати Бога, забудьте на Бога. А чоловік послухав.

А што принесла тота слобода? Так і ту діавол говорить: Што мі і тобі… нашто єсь ту, я понукам тому чоловіку і тым людям слободу, они тя не потребують. Тото говорить діавол і нам: Бог тя обмеджує, Божа заповідь, богослужіня, молитва, піст, одріканя, униканя зла – то вшытко є рабство. Ты можеш робити, што хочеш, нихто не мать право ті дашто наказовати. Ты не потребуєш никого, я ті давам слободу.

А видиме як міцны того світа, медії, прияли діаволску понуку. Як завзято повтрюють тото діаволске: што мі і тобі. Як атакують каждого, хто хоче повісти, але тото є зло, то веде до нещастя. Повторюють, што мі і тобі… І якы суть наслідкы той фалшывой слободы?

Діаволы не можуть устояти Божой близкости і просять войти до свинь. А Ісус їм доволює. І ціле стадо пропало і потопило ся у воді. Тым діавол одкрыв нехотячі свої планы з чоловіком. Указує на якбы слободу, котра веде до смерти, смерти вічной. Но він не повість чоловіку: приймий мою слободу, жый як хочеш, а я тя приведу до вічной погыбелі за тото, до вічных мук, вічного нещастя. Бо таке є моє наміріня. Він тото скрыє, а указує лем тото вонкашнє той фалшывой слободы а дочасне.

А Хрістос? Приходить подати правдиву слободу. Тот чоловік сидів при його ногах облеченый і здравого розуму. До його жывота вступив покій і радость. Хрістос обіцять правдиву словоду, вічый жывот і щастя. Но давать можность выбрати. Прияти понуку діавола з його якбы слободов, а наконець вічнов погыбельов. Або прияти слободу Хріста, котра веде через Його заповіді, молитву, піст, одріканя, униканя зла і робліня добра, а наконець з вічнов блаженостьов.

Дорогы радіослухачі, маме каждый день тоту можность, повторяти з діаволом: што мі і тобі. Або прияти Хрістову слободу. Слава Ісусу Хрісту!

В неділю, 16. новембра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 16. новембра 2025 р. о 12.00 год. і 17. новембра 2025 р. о 2.00 год. за русиньскым часом.