«Слово» – 25-та неділя по Сошествії Святого Духа – неділя, 9.00 год.

За Ісусом приходить учітель закона. Приходить, жебы дати вопрос: Што робити, жебы набыти вічный жывот. На першый погляд тот чоловік приходить, жебы щіро знати одповідь. Но євангелиста Лука додав, же учітель закона пришов, жебы покушав Ісуса.

То є, жебы нашов дашто, за што бы могли Його обвинити і передати смерти. Словами глядать дорогу ку жывоту, а у своїм сердці глядать дорогу ку смерти. То є глядать, як Ісуса обвинити і одсудити на смерть.

Ісус як Бог знав, што мав тот чоловік в сердці, не лем на словах. Прото не давать прямо одповідь, але сам кладе вопрос. Што написане в законі? Як там чіташ? На што він одповів о любви ку Богу і ближньому. Ісус втоды говорить: Добрі єсь одповів, так роб а будеш жыти. А він ся звідує: А хто є мій ближній? Втогды йому Ісус говорить образный приклад о чоловікови, котрый сходив із Єрусалима до Єрихона. Там на нього напали розбійнкы, окрали і охабили ледве жывого. Священик і Левіт лем перешли коло нього. Аж єден самарянин йому поміг а наложыв і на свого осла. Пришов з ним до гостинця і старав ся о нього. Потім давать пінязі маїтельови, же кедь ся верне, доплатить.

Тым образным прикладом Ісус поуказує на ціле людьство, котре гріхом пало до рук розбійників, то є демонів. Священик – Закон, ани Левіт – пророкы, не могли йому помочі. А Самаряним – то є сам Хрістос, котрый став про нас чоловіком, йому поміг а приношать до гостинца – свойой Церькви. Тым тому учітельови закона Ісус указав, же тым пораненым є він сам. А Ісус подавать на його раны невірства лік спасіня. Ісус го не одсудив , коли тот пришов глядати. Ісус пришов глядати дашто, што го выдало на смерть. Помаленькы го веде все высше. Не силує, але чекать, коли тот учітель закона одповість.

Хрістос пришов спасити каждого чоловіка. Никого не вылучує, хто одповість на його позваня. Він є нашым найблизшым ближнім, котрый нам хоче найвысше добро. А тыж нас учіть указовати тото світло іншым. Прото закончує тоту бісіду словами, котры адресує і нам: Ідь і роб так само. Слава Ісусу Хрісту!

В неділю, 29. новембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. новембра о 12.00 год. і 30. новембра о 2.00 год. за русиньскым часом.