«Слово» – 25-та неділя по Сошествії Святого Духа – неділя, 9.00 год.

Днешнє сово Євангелія нам з єдной стороны указує на велику любов Бога ку чоловіку, а з другой невдячность чоловіка. За Ісусом приходить якыйсь учітель закона з вопросом: Што робити, жебы набыти вічный жывот?

На першый погляд тот вопрос є з боку того знателя закона барз добрый. Тадь звідує ся на то, што найважніше в жывоті чоловіка – як набыти вічный жывот. Но євангелиста Лука додав: жебы Го покушав. Так видно, же тот чоловік устами ся звідує на вічный жывот, а своїм вопросом напряменый, жебы Ісуа поїмати а одсудити на смерть.

Ісус як Бог добрі знав наміріня того чоловіка, а так не давать йому одповідь прямо, но сам ся звідує: Тадь ты єсь знатель Писма і Закона, тогды што там написане? Як там ты там чіташ? А тот одповів: Будеш любити Господа Бога цілым сердцьом, душов, силов… а свого ближнього як самого себе. На што йому Ісус одповів: Добрі єсь повів, тото роб а будеш жыти.

То, што єсь высловив своїма устами, запровадь до жывота а набудеш вічный жывот. Бо ку тому суть напрямены два вопросы Ісуса: Што написане? Ту говорить о знаню Писма, котре є лем першов частков. Ту є тыж важне слово і про нас. Не старчіть мати лем знаня. Хвалити ся, же мам прочітане тілько а тілько з Писма. Мам выслухано тілько а тілько проповідей. Але важна є та друга частка – запровадити то знаня до жывота.

А тото собі усвідомив і тот учітель закона, словами: А хто є мій ближній? Мав знаня Писма і заповідей, але не жыв подля них. Не запровадив то до жывота. А Ісус йому одповів. Видів маленьку іскерку в його душі. Образным прикладом о чоловікови, котрый пав до рук розбійників.

Священик і левіт перешли коло нього без того, жебы йому помогли. Лем Самарян змилосердив ся над ним. Обвязав йому раны і постарав ся о нього привівши його до гостинця. А опросив ся того чоловіка: Хто быв тому ближній? А він одповів, же тот, хто йому поміг. А Ісус йому: Ідь і роб так само.

Самарян, котрый видів жыда в біді, йому поміг. Котрый быв йому неприятельом. Так Ісус на собі указав приклад такой любви. Часто Його звали самаряном. А так як тот самарян поміг в біді неприятельови, так Ісус указує свою любов і ку тому знательови Писма, котрый пришов з неприятельскым наміріньом ку Ньому. Жебы указати приклад і ро нас. Бо і нам адресує тоты слова: Ідь і ты, і роб так само. Я ті дав приклад. Слава Ісусу Хрісту!

В неділю, 26. новембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. новембра 2023 р. о 12.00 год. і 27. новембра 2023 р. о 2.00 год. за русиньскым часом.