«Слово» – 26-та неділя по Сошествії Святого Духа – неділя, 9.00 год.

В слові Євангелія нам Господь Ісус Хрістос говорить образный приклад. Єдному чоловікови поле барс щіро зародило. Він нараз діставать ся до сітуації, же не знать, што мать робити.

Він ся трапить над тым, же поле зародило, але іщі не мав під стріхов. Ішла інформація, же поле зародило. А він роздумує: Што робити? А давать сі одповідь, збурям сыпанці і поставлю векшы, і там позберам ціле моє богасттво. Потім, як тото буде зроблене, говорить собі, в душі тот чоловік, повім своїй душі, маш маєтку на многы рокы, їдж, пий, весель ся.

Але Бог говорить тому чоловіку: Вшытко даремне твоє намаганя в твоїй мыслі. Тадь він іщі нич не зробив, іщі не збуряв, не поставив, ани позберав. Він лем розоберав у своїй мыслі. Але такой приходить Посудитель людьскых думок, котры противять ся Божым заповідям. Іщі той ночі…Іщі той ночі прийде час смерти. А закончує, так буде з каждым, хто не є богатый перед Богом.

1. Гріх злодійства, котрый зробив тот чоловік было, то, же не дяковав Богу. Тадь він ся не намагав. Не говорив, Боже, дякую ті. То є твоя благодать, твоє милосердя, твоє благословліня, же земля дала своє богатство на моїм полю. Собі приписує заслугы.

2. Гріх злодійства – привластньованя того, што належыть Богу. Там дам ціле своє богаство. Забыв, же він є лем справця Божого маєтку, не властник. Называть, своє богаство.

3. Гріх, кедь говоридь своїй душі, душо маш маєтку на могы рокы: їдж пий і весель ся. Обіцять собі довгый жывот. Краде то, што належыть лем Богу.

Так днешнє слово подавать барз важну науку. Вшытко, што маме, што досягнеме, є вдяка Божому благослвліню. За вшытко маме дяковати і просльавляти Господа Бога, без помочі котрого не зможеме нич. Вшытко, што нам є дане, є дане як справцям, не властникам. Богу належыть вшытко. Маш вшытко выхосновати на шыріня Божого Царьства і на славу Божу. Тото выхоснованя мать обмеджіня в часі: не знате дня ани годины.

Теперь є тот час благодати, котрый Господь нам давать. Теперь маме творити добро. Завтра може зазвучати голос: Пожадають твою душу. Приймийме тото слово як слово напомянутя з любви. Жебы сьме не учули слово: Нерозумный… Але слова: Добрі, рабе добрый і вірный.

В неділю, 11. децембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. децембра 2022 р. о 12.00 год. і 12. децембра 2022 р. о 2.00 год. за русиньскым часом.