Слово – Неділя праотців. О вірі а вірности святых праотців старого завіта – неділя, 09.00 год.

Днешня неділя называть ся недільов праотців. Ставить перед приклад святых праотців Старого Завіта. Їх велику віру ку Богу.

Наприклад Ноя, котрому Бог повів поставити корабель, бо прийде потопа і грозить вшыткому погыбель. Ной увірив Богу і зробив так, як Бог йому наказав. Не брав огляд на высміваня многых. Вірив лем Богу. Або приклад Авраама, котрому Бог повів: Выйдь із свойой землі, а подь до землі, до котрой ті укажу войти. Авраам, хоць мав уж 75 років, увірив Богу. Вышов до незнамого края. Тыж увірив, кедь Бог йому повів, же його потомства буде як звізд на небі і піску на дні моря. І втогды увірив Богу, не запохыбовав. Ани коли Бог хотячі указати його віру, пожадав привести свого улюбленого сына Ісаака, як жертву. Авраам зробив вшытко як Бог йому наказав. Або тыж Мойсей, котрого Бог покликав, жебы вывів выбраный народ із Еґіпта, твердо вірив Богу в часі тажкых выпробовань, ці в часі 10-ох еґіптьскых ран, або і коли путовали по пустыні а при намйеншім недостатку, народ бунтовав ся. Мойсей остав вірный Божому слову.

Так можеме переходити цілый Старый завіт і смотрити на приклад праведників, котры нас днешню неділю учать важности вірити Божому слову, і тогды, коли то не є легке. Коли то выжадує жертву, одречіня, зношаня высміваня, потупованя. Но предці посліднє слово належыть Богу. Но тоты праведникы не лем вірили Божому слову, але остали і вірны Богу, коли находили ся в окружіню тых, котры ся оддавали ідолослужіню.

А так, кедь ся присмотриме на добу, в котрій жыли праведникы Старого завіта, можеме видіти, же тоти доба была подобна тій днешній. І мы жыєме в окружіня модерного ідолослужіня, новопоганства, котре, як епідемія заплавує світ. Наберать силу законів. Най і тоты праведны выпрошують нам благодать вытырвалости у вірі Божу слову і у вірности Богу. Слава Ісусу Хрісту!

В неділю, 29 децембра 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 29. децембра о 12.00 і 3.0 децембра о 2.00 год. за русиньскым часом.

фото горі:  Праотці Адам, Авел, Сет. Фреска  Теофана Ґрека, Новґород. 1378,     wikimedia

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА