«Слово» – 29-та неділя по Сошествії Святого Духа – неділя, 9.00 год.

Днешнє слово нам росповідать о очіщіню десять хворых на лепру. Они, як увиділи Ісуса, просили о выздравліня. Ісус їм наказав іти ку священикам, як ішли по дорозі познали, же были очіщены. Єден з них вернув ся подяковати Господу. Ісус обернув ся ку народу і повів: Де є тых девять? Чом Ісус так реаґує?

Він хотів дати науку о вдячности. Або скорше вказати на історію выбраного народа, котрый зазнав тілько добра од Господа, але барз часто забывали. Як приходив даякый проблем ці недостаток, бунтовали ся проти Бога. І так можеме характерізовати выбраного народа єдным словом – невдячность.

Но тото ся може односити і ку нам. Кілько добра зазнаваме од Господа од першого моменту свого народжіня і каждый день нашого жывота. Кілько раз Господь одпустив нам і нашы гріхы. Кебы сьме памятали на Божы добра ку нам, кебы сьме памятали на одпущіня нашых гріхів, мы бы не дали ся так легко збаламутити страстями, гріхом ці тым світом. Прото св. Василій так часто припоминать памятати на Божу притомность і його добра і благодати ку нам. У своїх двох проповідях о вдячности вказує, же Його дары так великы, їх так много, перевышують наше думаня. Од першого моменту дня маме дяковати Господу за новый день, за облечіня, за їдло, за кажду сітуацію. І вечур перед одходом на ночный спочінок дяковати за Божу мудрость, же перерывать нашы діла ночным сном і проти нашой волі, жебы по куртім одпочінку знову зреґенеровати нашы силы.

Прото Ісусовы слова: Де є тых девять, ці не было їх очіщеных десять?, най будуть і про нас напомянутьом не забывати на Божы добродійства. Слава Ісусу Хрісту!