«Слово» – 3-тя неділя по Сошетствії Святого Духа – неділя, 9.00 год.

Днешня неділя є уж третьов по празднику Сошествія Святого Духа. Євангеліє нам говорить о правдивім світлі. Ісус говорить образ із оком. Кедь є здраве око, ціле тіло ся находить у світлі.

А як є проблема з оком або є цалком темне, та ціле тіло є в темноті, бо не видить нич коло себе, де ся находить, де мать іти. Но Ісус Хрістос нам хоче повісти тым словом дашто глубше, што пояснює в днешнім слові, кедь переходить на напомянутя: Не можете служыти Богу і мамоні. Бо або єдного ся будете тримати і любити, а другого будете ним погорджовати і ненавидіти.

З того видно, же ту Ісус говорить не о світлі ока, але внутрішнім світлі нашой душы. Коли маме тото око здраве, то є маме здравый поґляд на тот світ, на наш жывот, тогды вшытко буде світле в нашім жывоті. Бо жыєме в покою, в свідомости того, же сьме в руках Божых, а не жыєме в рабстві. Но як ся погляд душы затемнить гріхом, страстями, привязаньом, тым самым тратиме споїня з істочником світла, а находиме ся в темноті. Тогды то, што є темнотов, што є лем образом реалности, будеме тримати за світло.

Тогды ся їдло, облечіня, пінязі стануть найголовнішыма в нашім жывоті. Бо тото нам нукать тот світ, котрый находить ся в руках злого. Він хоче погыбель людьскых душ, а так веде до того ідолопоклонства мамоны. Жебы люде обожовали і кланяли ся як божеству їдлу, моді, красоті.

Прото Ісус далше говорить: Не старайте ся, што будете їсти і пити, а до чого ся облечете. Давать приклады – небесных птахів а польовой лелії. Небесны птахы не сіють, не жнуть, не зберають до сыпанця, а Ваш Отець небесный їх кормить. Польовы лелії суть обліканы до красоты самым Господом. А ани Соломон, котрый жыв у великім богатстві і славі, не быв так облеченый, як єдна з них. А кедь Бог так облікать польову траву (перед тым назвав – красшу од облечіня Соломона), котра скоро спріє і шмарять єй на огень, та ці не скорше вас, маловірны?

А Ісус закончує словами: Глядайте наперед Боже царьство і його правду, а вшытко тото вам ся додать. Так тогды тото днешнє слово учіть нас мати здраве око нашой душы – видіти правдиво вшытко коло себе з погляду вічности. А учіть нас вірити, же маме Отця, котрый ся о нас старать веце як о небесны птахы ці польову траву.

А кедь тото знаме, а подля того і жыєме, не даме ся до рабства мамоны і не будеме тому служыти як божеству, але будеме правдивыма служытелями Бога, котрый є нашым небесным Отцьом. Слава Ісусу Хрісту!

В неділю, 29. юна 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. юна 2025 р. о 12.00 год. і 30. юна 2025 р. о 2.00 год. за русиньскым часом.