«Слово» – 3-тя неділя Великого посту – неділя, 9.00 год.

Днешня неділя є уж третя неділя святого Посту. Тыж называть ся і Крестопоклонна. На утрені ся выкладать святый Крест, котрый буде на тетраподі до пятніці. Даваме сі вопрос, чом в середині поста нам свята Церьков указує на крест.

Коли сьме вступовали до свяьой добы посту, ішли сьме з многыма постановлінями, планами, што хочеме зробити про нашу безсмертну душу і хосен ближнього. Но часом як ідуть дні поста, силы поступно ся уменшують.

Є то подобно як кедь є хтось на морі довгый час а берега не видно. Нападають думкы малодушности. Так і хто бере важно тоту добу, його силы ся умешують. Прото свята Церьков нам указує на крест як на підкріпліня, посилу, жебы ся обнлвили нашы силы поглядом на крест, не як на знак терпіня і болести, але як на знак побіды.

Крест уж нам голосить, уж є близко Пасха. Ціль, ку котрому ідеме уж є видно перед нами. Уж не довго, не падайте до малодушности, але приймите підкріпліня до далшого прямованя ку цілю.

Тота побіда креста уж была передзображена в Старім завіті. Поукажме на дві місця з Книгы Чісел (4. Книга Мойсея). В 2. Главі Книгы Чісел чітаме, якым способом выбраный народ путовав по пустыні по выході з Еґіпта. Народ быв розділеный по три племя на кажду соторону, в середині Ківот Завіта. І так то было знаком святого то Креста. І народы, котры то виділи або о тім чули, якбы падали до малодушности, перед тым знаменом, в котрім поступовав Ізраіль.

А в 21. главі Книгы Чісел чітаме о далшій події. А то, же народ часто пропадав невіры, скоро забывав на Боже добродійства. А при найменшім недостатку дудротали, бунтовали ся проти Мойсея але і проти Господа Бога. Так Бог на них посылать їдоваты гады, котры їх грызуть і умерають у великім множестві. Тогды народ просить Мойсея о застоятельство перед Богом. А Господь наказує зробити мідяного гада і поставити на паліцю, а каждый погрызеный мав з віров посмотрити на мідяного гада і остав жыти.

Тоты дві події указують на побіду креста, тым знаком котрого ся бояли народу Канаану перед выбраным народом. Так ся того знаку боять демоны і утікають, коли є выставленый св. Крест а коли робиме знак креста і на собі.

А через крест нам быв дарованый лік на погрызіня пекелным гадом через гріх. Так нам св. Церьков ставить св. Крест як тот знак побіды. Жебы сьме ним підкріплены, обновили свої силы, запаленость іти далше ку цілю – Пасхы, але і ку вічному цілю – баженій вічности. Слава Ісусу Хрісту!

В неділю, 15. марца 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. марца 2026 р. о 12.00 год. і 16. марца 2026 р. о 2.00 год. за русиньскым часом.