«Слово» – 4-та неділя по Сошествії Святого Духа – неділя, 9.00 год.

Ісус Хрістос приходить до Капернаума, там жыв чоловік, котрый быв римскым стотником. Тот приходить за Ісусом з великым трапліньом. Мав раба, котрый барз дома терпив. Тот стотник пришов і выливать своє сердце перед Хрістом. Не говорить там слова просьбы: прийдь і влож на нього рукы. Він лем выповів своє трапліня, далше уж дасть волю Ісусови, жебы Він зробив як Він хоче.

Мы часто, коли молиме ся, такой даваме тото слово: Господи, выздрав, Господи, дай, Господи выповний. Но тот стотник цалком ся довірив Ісусови. А Ісус одповів: Я прийду і выздравлю. Но стотник повів: Я недостойный, жебы ты вышов під мою стріху, лем слово повідж, раб буде здравый. А додав, же собі усвідомляв, же прияв владу од імператора, а єдночасно з тым і він мав владу над іншыма. А говрить, кедь повім єдному ідь, іде, іншому зроб так, він зробить.

Тыма словами як бы тот стотник повів, кедь я чоловік мам таку владу, то о кілько веце ты маш владу над вшыткым і над хворотов. Прото стачіть лем товє слово, а раб буде здравый.

Тот стотник увірив у Хріста, в його божество. Же Він є тот, котрый мать тоту владу. Ісус вызвигує якраз тоту віру, кедь повів: Ани в Ізраіїі єм не нашов таку велику віру. А потім Ісус дале говорить слова: І прийдуть многы од выходу і западу, і засядуть в Царьстві небеснім. Але тыж додав: сынове царьства будуть вышмарены вон до вонкашньой тмы. Там буде плач і скреготаня зубів.

Тот стотник нас учіть потребі увірити слову Хріста. Довіряти, приходити і выляти своє сердце, але давати простор Богу, най діє ся так, як ты хочеш. Далше нас учіть повиновити ся світьскій владі, коли їх наказ не противить ся Божому слову, коли нас не хоче поставити проти Бога, або прямо одвернути од Хріста. Бо тогды треба повісти слова: Бога треба веце слухати як людей.

Тыж нас нам указує, же не стачіть лем самы слова, хвлаіня ся нашов віров, коли наш жывот буде противный тому, тогды зазвучать слова: сынове царьства будуть вышмарены вон… А стотник указує, же не остав лем на словах. Його віра не была лем в словах, але потверджена ділами. Наконець Ісус додав: Ідь а най буде так, як єсь увірив. А в тій годині быв його раб выздравленый. Учме ся тото і мы од того стотника. Слава Ісусу Хрісту

В неділю, 6. юла 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 6. юла 2025 р. о 12.00 год. і 7. юла 2025 р. о 2.00 год. за русиньскым часом.