«Слово» – 4-та неділя Великого посту – неділя, 9.00 год.

Днесь є уж 4-та неділя Великого посту. Євангеліє нам розповідать выздравліня бісноватого хлопця, котрого його наперед отець привів ку Ісусовым ученикам, з котрых Петро, Яков і Йоан были в тім часі на горі Тавор.

Но ученикы йому не могли помочі. Коли Ісус сходить із горы, втогды приходить отець того нещасного і просить і помилованя. Но в його словах мож чути тиху скаргу: Я привів го ку твоїм ученикам, но они были без силы. Тото могло выкликати і высміваня у народа над учениками. І так може тот отець в дусі собі повів: Хто занать, ці зможе і Ісус тото зробити, кедь дав владу учениками, а они не могли. Ісус прото реаґує так твердо: О невірне поколіня – жебы загнати такы думкы од народа. А отець оставать в тім недовірю і говорить: Кедь можеш, помож нам. А Ісус на то: Кедь можеш – вшытко можне тому хто вірить.

Діявол старать ся засіяти до сердця похыбности двоякой сорты: Або жебы чоловік перестав вірити, же Бог є, же мать вшытко у своїй моці; або, же не є добрым, кедь допущать зло. Кедь і мы в сучасній сітуації ся може находиме в покушіню підволити ся злому такыма покушінями, закличме вєдно з тым отцьом: Ісусе вірю, помож мойому невірьству, моїм похыбностям. Слава Ісусу Хрісту!

В неділю, 29. марцa 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. марця о 12.00 год. і 30. марця о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА