«Слово» – 4-та неділя Великого посту – неділя, 9.00 год.

Перешли уж 4 тыждні святой Чотыридесятніці. Того благодатного часу, котрый Господь нам дав як великый дар на дорозі нашого плаваня до приставу Пасхы. Каждый день чуєме Боже слово з Книгы Бытія або Притчей, ці на 6. часі слова пророка Ісаії. А в суботу і неділю слова євангелія, котры нам все додавають підкріпліня і утверджіня нашой віры.

І днешнє слово Євангелія, котре описує інтересну подію, котра ся одбыла в часі, кeдь Ісус з Петром, Яковом і Йоаном сходили з горy Тавор. Ученикы были проникнуты, ужаснуты тым вшыткым, чого были свідками. А ту нараз приходять долов, а як бы зобудии зо сна до твердой реаліты. Видять множество народа, котрый голосно ся о штось перечать. А тогды єден з народа, быв то отець сына, котрый быв опанованый нечістым духом, тот отець приходить за Ісусом а говорить: Привів єм ку тобі свого сына, котрый є в моци злого. Но наперед ку твоїм ученикам, кедьже тебе єм не нашов. Но они го не могли выздравити. Так кедь дашто холем ты зможеш, та помож.

Реакція Ісуса была тверда. Повім собі, чом так твердо реаґує? О, невірне і покручене поколіня, доколи іщі буду з вами? Доколи вас мам терпіти? Што тым Ісус хоче повісти?

Тот отець чув о ділах Ісуса, пришов з віров, же може прияти добродійство про свого сына. Но кедь го не нашов, так собі повів, суть ту його ученикы, істо, кедь мають такого учітеля, зможуть мі помочі, но не могли. А тогды, коли вшыткы довкола тото виділи, безсилность учеників, а іщі і слова того отця, він як бы посіяв сімена невіры, або ліпше сімена віры в силу зла. Так много зачали похыбовати, ту уж ани сила Хріста нич не зможе. Зато Ісус називать їх роде невірный!

Вы, котры сьте были свідками тілько моїх чудесных діл, знамен, выганяня демонів, воскресіня мертвых. А теперь похыбуєте. Теперь вас діавол опановав духом віры в себе, в силу зла? Бо отець в такій безнадії говорить: Кедь дашто можеш, помож нам. Уж переставав вірити, же Ісус ту може дашто помочі. Зато реакція Ісуса была так тверда, жебы їх зобудив з того діавольского сна невіри, або віры в силу зла.

А говорить, вшытко можне тому, хто вірить. А такой выздравлять того хлопця. А тото є посолство і про нас. Не вірити в силу зла. Ай коли сьме свідками зла коло себе, коли ся нам видить, же ту уж нич не поможе. Ту звучіть то слово нашого Гопода: Вшытко є можне тому, хто вірить.

Коли діавол нам засівать тоты думкы невіры до сердця – ты уж ся не зміниш, тобі уж нихто не поможе, твій гріх є силнішый як вшытко, ты ся уж не можеш змінити, там звучіть – вшытко можне тому, хто вірить в Божу силу. Хто приходить з віров ку Ісусови, котрый є тот самый як вчера, як тогды, коли выповів при тім народі о тім отцьови тоты слова.

Так і днесь говорить в тім постнім часі і ку нам. Вірьте правов віров, то є віров в мене, в мою силу. Не дайте ся збаламутити діаволови, котрый хоче вам посіяти сімена віры в себе, віры в силу зла. Слава Ісусу Хрісту!

В неділю, 22. марца 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. марца 2026 р. о 12.00 год. і 23. марца 2026 р. о 2.00 год. за русиньскым часом.