«Слово» – 5-та неділя Великого посту – неділя, 9.00 год.

Ісус іде до Єрусалима. Понаглять ся. Ученикы зо страху ідуть за ним. Тогды їм говорить о своїх муках, котры го чекаять в Єруалимі. Говорить їм жебы їм дав підкріпліня і указав, же то, што ся з ним буде діяти, Він бере на себе добровольні про спасіня людей.

А тогды двоми з його учеників, Йаков і Йоан, Го просять о першы місця в його царьстві – єден на прово, другый на ліво. Ісус правом реаґує – не знате, што просите. Справды не знали. Тадь сидіти на правій і лівій стороні в Єрусалимі значіло быти на кресті – як розбійникы. Но ученикы тому не розуміли.

Они мали розуміня Жыдів о Божім Царьстві. Мали розуміня, же Хрістос буде міцный царь, котры обновить славу Ізраільского царьства. Но Ісус говорить о чаші і крещіню – говорить о чаші страстей і крещіню кровли. Но ученикы не розумлять а так говорять – можеме пити, може крестити ся, на што Ісус одповів – будете, але і так сидіти, де вы хочете, не моїм ділом вам дати.

Іншы ученикы не были барз ліпшы в розуміню Царьства, лем они то явно не выповіли. Но в їх реакції на тых двох – мерзили ся на них, одкрыла ся хворота їх душы. А Ісус подавать їм лік. Хто хоче быти першый – будь слугом вшыткых. А кедь хочеш быти головный – будь вшыткым рабом. Ісус ту не сперать мати прягнутя першенства ці быти головным, але указує, якы прінціпы суть Божого Царьства – є то першенство любви, покоры.

Тому і мы ся учме быти першыма в покорі, в служіню любви. Приймиме і мы тоты слова нашого Господа, котры Цам потверджує своїм жывотом, бо повів: І Сын чоловіка не пришов, жебы йому служыли, але послужыти і дати жывот за многых. Слава Ісусу Хрісту!

В неділю, 18. апріля 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 18. апріля о 12.00 год. і 19. апріля о 2.00 год. за русиньскым часом.