«Слово» – 6-та неділя по Сошествії Святого Духа – неділя, 9.00 год.

Коли Ісус Хрістос ослободив двох опанованых демонами, переплавив ся на другый берег і пришов до свого міста. Там принесли невладного. Ісус, кедь видів їх віру, повів невладному: Не бій ся, сыну, твої гріхы суть одпущены.

Дакотры із фарізеїв думали у своїх сердцях: Тадь він ображать Бога, як таке може повісти! Но Ісус видів до їх сердця і говорить їм: Чом так плано роздумуєте у своїх сердцях? Што є легше повісти, одпущають ся ті гріхы, ці встань і ходь? І на доказ того, же Ісус мать силу одпущати гріхы, выздравлять невладного.

Но наперед Ісус выздравлять його душу. Приношать покій до його душы, котра была непокоєна гріхами, вытыканьом совісти. Най буде спокійне твоє сердце. Коли є нечіста совість, чоловік не мать покоя, ці є на самоті або в обществі із іншыма людми. Ісус пришов принести покій нашым душам, ослободити із рабства гріха, як того найвекшого зла.

Тілесне здравя без духовного не приношать хосен. Прото днешнє євангеліє нас учіть о важности мерьковати на свою безсмертну душу, на їй здравя. А коли ся стане, же захворіє, упаде до гріха, давать нам тото радостне посолство: Є ту тот, котрый може одпущати гріхы. Ісус є приготовленый все нам одпустити. Не вытыкать нам нашы гріхы, але радує ся нашому покаяню. Бо сам повів: Подьте ку мі вшыткы… і хто ку мі приходить, не одожену од себе. Слава Ісусу Хрісту!

В неділю, 19. юла 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. юла о 12.00 год. і 20. юла о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА