«Слово» – 7-ма неділя по Сошествії Святого Духа – неділя, 9.00 год.

Коли Ісус Хрістос воскресив дівку Яіра, а перед тым жену хвору на кровотечіня, а як одходив одтыль, двоми сліпы зачули, же Ісус є там поблизку. Ідуть за ним. Они, хоць были тілесно сліпы, але їх духовны очі ся отворили.

Видиме то з діалоґу, котрый наслідовав меджі нима і самым Хрістом. Они кричать за Ісусом: Ісусе, сыне Давіда, розмилуй ся – елеїсон, над нами. Ісус ся їх звідує: Вірите, же я тото можу зробити? Тоты слова, котры Ісус говорить, суть адресованы і нам. І нам говорить: Віриш, же можу тото зробити в твоїм жывоті? Же без огляду на то, як далеко єсь зашов од мене у своїм жывоті, Я єм ту про тебе, же можу тобі дати одпущіня, дати тобі новый початок? Же од днесь може зачати дашто нове в твоїм жывоті?

Діавол часто старать ся о то, жебы привести до отчаянія – до страты надії. Нашептавать до душі: Про тебе уж не є помочі, ты уж не повстанеш зо свойого гріха, тобі уж Бог не може одпустити, а так вздай то, ужывай собі ту на землі, про тебе уж не є спасіня. Ты падаш до того самого гріха, тобі уж не є помочі. То суть слова діавола, котрыма старать ся тримати в своїм рабстві, в духовній сліпоті. А ту звучіть слово Хріста: Віриш, же Я воскрес, переміг гріх, смерть і діавола? Я ті можу дати новый жывот, одпустити твої гріхы.

А сліпы одповідають: Віриме. А што ся стало? Ісус їм повів: Так тогды най подля вашой віры ся вам стане. Не повів їм: Добрі, най отворять ся вам очі. Але подля того, як сьте высловили.

Подобно і стотник, коли повів слова: Повідж лем слово, а мій раб буде здравый. Чом? Бо увірив Ісусови, же справды так є. А і йому Ісус повів: Най буде так подля твойой віры. А выслідок? Його раб быв в тій годині выздравленый. Тоты сліпы не говорили лем так тоты слова. Бо они уж провиділи. Уж мали ясны свої духовны очі. Увірили Хрістови, же Він є Сыном Давіда, Спасительом.

Друге чудесне діло в днешнім слові, коли привели чоловіка німого, опанованого демонами. Того ся Ісус не просить, але такой выганять злого. Указує, же зо злым не потребує вести діалоґ. Бо демон хоче лем єдно – погыбель людьскых душ. А такой выганять демона, і тогды німый зачав бісідовати. Знову, наперед выздравлена душа, аж так тіло. Бо якый хосен бы быв выздравити його тіло од німоты, коли в душі быв демон, котрый бы його уста выхосновав на зневажованя Бога?

Так днешнє слово ку нам говорить: Коли ідеш ку Ісусови, в твоїй душі звучіть Його ласкавый голос: Віриш мі, же я тото можу зробити? Одповідайме і мы так як тоты сліпы: Віриме, Господи. Слава Ісусу Хрісту!

В неділю, 27. юла 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. юла 2025 р. о 12.00 год. і 28. юла 2025 р. о 2.00 год. за русиньскым часом.