«Слово» – 8-ма неділя по Сошествії Святого Духа – неділя, 9.00 год.

Днешнє слово Євангелія зачінать словами: Коли Ісус вышов із лодькы, увидів множество народа. Тота подія стала ся курто по мученицькій кончині святого Йоана Крестителя, коли Ірод дав його убити в день своїх народенин.

Як дали Ісусови знати о тім, хоць як Бог знав о тім, тогды вєдно зо своїма учениками насів до лодькы і выбрали ся на пусте місце. Но дакотры з людей збачіли, де мають напрямене, і спередили їх по сухій землі. А так, як пришли, Ісус видів уж множество людей. А євангеліста нам говорить і о чіслі людей. Пять тісяч мужів окрем жен і дітей. Так можеме сі додумати, же могло там быти пятнадцять аж двадцять тісяч людей.

А Ісус їм не повів: Теперь не є час. Прийдьте завтра. Днесь хочу быти зо своїма учениками. Но Боже слово нам говорить: Ісус ся змилосердив над нима. Выздравляв їх хворых. Видиме віру народа. Нелем здравы люди ішли, но брали зо собов і хворых. Тыж Ісус нелем тото зробив, але і учів народ. Тадь перебывали цілый день.

А коли надышов уж вечур, ученикы говорять Ісусови: розпусть народ, най іде собі купити їдла і найти переночованя. Ученикы сі подумали, уж было про тот народ зроблено дость. Уж най ся порозходять. Но Ісус їм повів: Не мусять ниґде іти, вы їм дайте їсти. Тоты слова были чудныма про учеників. Говорять Йому: Мы ту маме лем пять хлібів і дві рыбкы. Та што то є пто тілько народа? З того людьского погляду могли ученикы подумати, што Він нам говорить, же маме накормити тото велике множество з тыма пару хлібцями і рыбками? Та ся не дістане ани їм, і мы будеме голодны. Ученикы взяли зо собов лем найпотребніше, жебы мали што їсти.

А Ісус їм повів: Принесте мі їх ту! Ісус од них вымагать, жебы дали то, што мали про себе. Они не повіли, тадь то не мать смысел. Тадь і мы будеме голодны. Но они послухали, дали то маленько, што мали, Ісусови. Не знали, што буде наслідовати. Ісус дав їм наказ, розсядьте народ по громадках по пядьтесять. Потім взяв хлібы, посмотрив ку небу, поблагословив, розламав і давав ученикам. Ученикы ходили помеджі народ і розношали. А нелем, же каждый прияв фалаточок хліба і рыбкы, но вшыткы їли і понаїдали ся. А іщі назберали повных дванадцять кошів одробин, што зістали.

Тов подійов указав, же Він є Владыка неба і землі. Же Він давать выроснути зерну зо землі і наповює воды рыбками. А ту зробив в єднім моменті тото, што робить про вшытко жыве. Тыж дав науку ученикам, жебы не бояли ся дати і то маленько, бо прияли омного веце.

Так і нас тото слово учіть, коли нам Господь говорить, дай мі то мало, што маш, а Господь то помножыть на твій властный хосен і хосен ближніх. Слава Ісусу Хрісту!

В неділю, 3. авґуста 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. авґуста 2025 р. о 12.00 год. і 4. авґуста 2025 р. о 2.00 год. за русиньскым часом.