«Слово» – 9-та неділя по Сошествії Святого Духа – неділя, 9.00 год.
По завершіню чудесного діла розмножіня хліба, Ісус попогнав своїх учеників насісти до лодькы і спередити його на другый берег, покля він розпустить народ. Кедь так зробив, выходить на гору помолити ся. Быв уж вечур і Ісус быв на горі лем сам.
А ученикы были уж в середині моря на лодьці, котров метало, бо дув противный вітор. Ісус видів їх мозоліня, приходить ку ним, ходячі по воді. Ученикы зістали самы, якы думкы ся переганяли їх головами, кедь мусили одолавати вітру і волнам, котры заливали лодьку. Як собі желали, жебы Ісус быв із нима! А його не є. Він зістав там і они зохаблены самы на себе. І як го збачіли, ідучого по воді, наповнив їх страх. Думали собі, же то пивиджіня даяке. Може сам злый взяв його подобу, жебы їх загубити. Уж їм не є помочі. І з того страху кричали. Но Ісус ся їм такой озвав: Будьте смілы, нашто дозволяте, жебы вас овладнув страх? Тадь то єм я. Не бійте ся. І Петро, із радости і як на доказ, хоче од Ісуса дозволіня прийти ку ньому по воді. Ісус му то дозволив і Петро ішов по воді, як по твердій землі. Но нараз збачів силный вітор, в його голову приходять похыбности і в тім моменті ся зачав топити. Але іщі зареаґовав: Господи сохрань мене! Ісус го хопив, вытягнув і повів йому: Маловірный, чом єсь заколысав у вірі? І приходом Ісуса ку лодьці перестав і вітор. Вшыткы на лодьці ся му поклонили: Ты справды Сын Божый.
Ісус і нас учіть, жебы не довольовати думкам похыбности і страху проникнути до нашой душі. Але в каждім ділі і в каждій сітуації, хоць як бы была тяжков, памятати на тоты Ісусовы слова: Будьте смілы, то єм я, не бійте ся!. Слава Ісусу Хрісту!
В неділю, 29. юла 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 29. юла о 15.00 о 20.00 год. і 30. юля о 2.00, год. за русиньскым часом.
Фото: Ісус ходить по морю, Амаде Варен. Жрідло: Wikipedia.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
