«Слово» – Друга постна неділя – неділя, 9.00 год.

Євангеліє Другой постной неділі нам говорить, як Ісус приходить до Капернаума, там ся ку ньому такой позбіговало много людей, котрым проповідав і їх учів. Приходать і четверо мужів, што несуть невладного чоловіка, но не мають як ся дістати ку Ісусови, бо народа было тілько, же ани при дверях не было місця, не іщі протиснути ся із чоловіком лежачім на постелі.

Они видячі, же не зможуть войти перед Ісуса, выходять на стріху і через під спущають невладного перед Ісуса. А Ісус видячі їх віру, наперед выздравлять душу того чоловіка, звязану паралізов гріхів, і аж так його тіло. Но многы фарізеї і учітелі закона нарікають на Ісуса, же говорить ругавы бісіды, бо сі узурпує то, што належыть лем Богу: одпущіня гріхів. Но Ісус познав до глубкы їх сердця, перед ним нич не зістало скрытым, а так о тім, о чім они скрыто думають, ся їх звідує явно: Чом так бісідуєте у своїх сердцях? А выздравліньом тіла вказує, же може подати здравля душі і тілу.

Ісус чітав в сердці тых людей, што принесли того невладного. Видів їх любов ку тому чоловіку, видів і їх віру. Чітав і в сердцях тых фарізеїв наповненых нечістототв і нечестностьов. Памятайме, же Ісус чітать і в нашых сердцях. Перед Ним нич не мож сховати. Він є правдивым Богом, але тыж чоловіколюбным, котрый не хоче смерти грішника, але обернутя і жывот. Далше нам днешнє євангеліє вказує, як важне є выхосновати тот спасителный час посту, выхосновавши средства: молитвы, посту, милостыні, сокрушености і плачу над гріхами. Мати тоту духовну ревность, яку мали тоты четверо мужів із євангелія. Но важне є собі усвідоміти, же лем своїма силами того вельо не зможеме. В духовнім жывоті нич не зможеме. Они принесли невладного, мозолили, вышли на стріху, мали віру, же Ісус може його вылічіти. Но они сі усвідомляли, же вшытко залежать од Ісуса. Аж на його слово быв здравый на душі і на тілі.

Так і мы выхоснуйме тот час, робме, што од нас залежыть, но успіх в тім ділі нашой духовной намагы приписуйме не собі, але Богу, його помочі, Його благодати. Слава Ісусу Хрісту!

В неділю, 4. марца 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 4. марца о 15.00, 20.00 год. і 5. марца о 2.00, год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Капернаум. Жрідло: Wikipedia.