«Слово» – Неділя мытаря і фарізея – неділя, 9.00 год.

Днешньов Недільов мытаря і фарізея вступуєме до приправного часу на вступ до святой Штиридцятніці. Ісус Хрістос говорить образный приклад о двох людях, котры вошли до церькви ся помолити. Уж початок того слова є важный про нас.

Тоты люде вошли до церькви ся помолити – дайме собі мы вопрос і одповідь – ідеме до церькви ся молити, або роздумовати в часі богослужінь о вшыткім , лем не о Богу – о красоті храму, о тім, што мі треба зробити, ці хто мать яке облечіня? Они ішли ся помолити!

Єден фарізей а другый мытарь. Фарізей стояв цалком впереді, быв то чоловік, котрый із вонкашнього погляду представляв досконалость. Не быв собі свідомый даякых гріхів, а так зо смілостьов ся молить: Боже, я ті дякую… Зачінать добрі, тадь маме дяковати Богу наперед за вшытко, што нам дав. Насамперед за дар жывота, за вшыткы благодати, способности, же вшытко, што мы зробили, лем дякуючі Божій благодати. Но він так не робить. Продовжать – дякую ті, же я не так, як іншы люде. Значіть, він одділює себе од іншых, одсуджує вшыткых, а потім зачінать говорити о своїх добрых ділах: пощу ся два разы до тыждня а давам зо вшыткого десяткы. А на тім закончів.

А так він не пришов насправды ся помолити, бо забыв, де є а перед кым стоїть. Він ся пришов лем похвалити перед Богом а понижыти вшыткых. Він Бога не потребує, не є собі свідомый гріхів. Жыє в своїм самозбаламучіню.

Мытарь? Тот стояв цалком взаду, ани очі ся не осмілив підняти ку небу. Бо сі усвідомльовав, свою грішность. Але тыж і то, же Бог є милосердный. А так складать своє минуле, свій жывот в тых словах: Боже, будь милостивый мі грішному. Там є обсягнуте вшытко: узнаня вины і усвідомліня потребы Бога.

Розділ міджі тыма двома є, же обідвоє грішникы – лем фарізей про пыху свою гріхы не видів. Видів лем свою праведность і гріхы другых. А мытарь не видів гріхы другых, але через покору видів свої властны і потребу Божого одпущіня. Того і Ісус вывышує, кедь говорить: тот одышов оправеданый, бо ся понижыв перед Богом. Покора і грішника піднимать горі, а пыха і справедливого зверьгує долов.

Так нам свята Церьков в тій першій неділі указує на небезпеченство пыхы а указує на великость покоры. А так учме ся добрым ділам од фарізея, але не наслідуйме його пыху. Учме ся покорі од мытаря, але не наслідуйме його опередні діла. Слава Ісусу Хрісту!

В неділю, 9. фебруара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. фебруара 2025 р. о 12.00 год. і 10. фебруара 2025 р. о 2.00 год. за русиньскым часом.