«Слово» – Неділя мытаря і фарізея – неділя, 9.00 год.

Днешньов Недільов мытаря і фарізея уж вступуєме до часу, котрый нас приготовлять на вступ до святого Великого посту. Суть то штири неділі: Мытаря і фарізея, Блудного сына, Мясопустна і Сыропустна. О чім є днешня неділя?

Уж само слово в назві нам говорить о двох катеґоріях людей, котры сі были протистоячі. Мытарі і фарізеї. Хто были фарізеї, яке было їх поставліня? Были то люде, на котрых смотрили як на святых. Мали быти прикладом докладного дотримованя Божого закона і його заповідей. Стояли і на рогаг улілць, жебы їх люде виділи, як они, так они думали, суть благочестивы, як они памятають всядыль на молитву, на Господа.

А в такій самопевности є і фарізей із днешнього слова. Іде до церькви аж допереду, і стоячі ся молить в собі: Боже, дякую ті. Ту ся позаставме. Тот фарізей може часто заганьблює і нас. Мы часто забываме на тото словко дякую в молитві, а часто резонує в нас: прошу, дай, выліч, помож… Здогадаме ся на молитву, коли нам є тяжко, маме даяку проблему, ці хвороту. А кедь нам добрі?

Но тот фарізей добрі зачав, але уж недобрі іде далше. Бо говорить, же я не так, як іншы люде… або і тот мытарь там взаду. Фарізей знеґовав то, што зачав. Обернув молитву на высміх, понижованя, погорджованя. А потім на выхвальованя: я ся пощу і давам десяткы.

Ісус на єднім місці на вопрос, котра заповідь є головна, повів: Будеш любити Господа… а свого ближнього як себе самого. А посмотьме на молитву фарізея: Де є любов ку Богу? Де є узнаня авторіты Бога над собов, де є дякованя за жывот, за дары од Бога? А любпов ку ближньому? Тадь він каждого видить пониже себе, нихто не є достойный ся з ним порівняти.

А мытарь? То были люде, котрых ненавиділи, бо служыли Риму, выберали поплаткы а допущали ся многых кривд. Як то видиме на Закхейови, котрый быв головный мытарь. Але котрый хотів увидіти Ісуса, і іде на стром, жебы схованый в листю збачів Ісуса. А Ісус його закликав: злізай долов, бо днесь мам быти в твоїм домі. А што стало ся? То стрітнутя з Хрістом мінить його жевот. Господи, кедь я дакого скривдив, верну йому штири раз веце. А Ісус говорить: днесь пришло спасіня до того дому.

Так і тот мытарь в церькви сі усвідомив свою грішность, видів в близкости Бога свої гріхы. А повторять, Боже, будь милосердный мі грішному.

Ісус ту не хвалить ани фарізея за то, же ішов на молитву, ани мытаря за його діла і грішный жывот. Но учіть нас вытягнути хосенне од єдного і другого. То є од мытаря ся учіти покаяню і покорі, не падати до безнадії за нашы гріхы; а од фарізея зясь взяти выповняня Божых заповідей, піст, молитву. Так набудеме хосну беручі позітивне од єдного і другого. і уникнеме шкоді уникаючі од того неґатівного в жывоті єдного і другого. Слава Ісусу Хрісту!

В неділю, 1. фебруара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. фебруара 2025 р. о 12.00 год. і 2. фебруара 2026 р. о 2.00 год. за русиньскым часом.