«Слово» – Неділя перед Богоявленієм – неділя, 9.00 год.

Днесь маме Неділю перед Богоявленієм. Нашы літурґічны тексты нас кличуть духом ся перенести од Віфлеєма ку Йордану, де выступив Йоан Креститель, і де крестив. І приходило много людей ку ньому, жебы дати ся покрестити, сповідаючі свої гріхы.

На днешній вечурні чітають ся парамії зо Старого завіта о воді. Єдна з них говорить о події, котра была передобразом того, што ся теперь одбывать на Йордані. Коли Выбраный народ ішов із Еґіпта, провадив його Мойсей. Но Мойсей, не выдав достаточне свідчіня о Божій силі. Было то, коли народ не мав што пити, і зачали нарікати на Мойсея. Бог ку ньому повів, вдарь по скалі і выйде вода. Мойсей і Арон поставили ся перед народом і повіли: Ці мам Бог выведе зо скалы. І вдарили по скалі і вышла вода.

Но повів ку Мойсейови і Аронови: Зато, же сьте не дали того твердого сдвічіня перед народом о моїй силі, але дали сьте принагоду ку похыбованю, не войдете до обіцяной землі. Так, коли уж были на догляд од обіцяной землі, Бог выводить Мойсея на гору, і Мойсей там умер. Тогды на тридцятый день проговорив Бог ку Ісусови Навинови – накаж священикам, най возьмуть Кивот Господній і вступлять на край Йордану, вода ся розділить.

І Ісус Навин говорить ку народу: Днесь спознате, же Господь є жывый меджі вами. І стало ся так, як Гопсодь повів: Лем што ся ногы священиків несучіх кивот дотулил вод Йордана, а то в часі, коли ся Йордан наводняв, коли на нижній части ся аж выливав про велике множество воды зо свойого корыта, вода ся повинує свойому Творцьови, такой ся розділює на дві часткы. Спідня стікать до мертвого моря, а верьхня є якбы великов градбов. А народ сухов ногов перходить через Йордан.

А коли вшыткы перешли, Бог говорить ку Ісусови, накаж най священикы перейдуть через Йордан і выйдуть на берег. А коли так зробили, коли ся їх ногы дотулили берега, водя ся знову злляла на своє місце.

Дорогы радіослухачі, на тім місці, де перешов выбраный народ через Йордан під веджінєом Ісуса Навина, там приходить Йоан, жебы покрестив нового Ісуса – Хріста, правдивого, котрого тамтот лем передображовав. А котрый веде свій Новый Ізраіль уж не до обіцяной землі на тім світі, але через духовный Йордан святого крещіня веде Новий Ізраіль, то є нас, котры сьме увірили, до вічной обіцяной землі. До вічного блаженства.

Так памятайме в тім часі на тот великый дар, котрый нам быв крещіньом Ісусовым подарованый. А будьме вдячны за святе крещіня, котрым сьме перешли од смерти ку жывоту. Вєдно з Хрістом сьме были занурены, нашы гріхы потоплены, жебы сьме жыли новым жывотом. Як то співаме: Котры сьте были покрещены в Хріста, в Хріста сьте ся облекли. Хрістос раждається!

В неділю, 18. януара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 18. януара 2025 р. о 12.00 год. і 19. януара 2026 р. о 2.00 год. за русиньскым часом.