«Слово» – Неділя розслабленого – неділя, 9.00 год.

Пережываме святу радостну Пасхалну добу. Минувшы дві неділі Томина і міроносиць нам подали утверджіня віры у Воскресіня. Но днешня неділя – виздравліня розсалбелного, як бы ся одхыльовала од темы Воскресіня. Но лем з вонкашнього погляду.

Ісус приходить до Єруалима на праздник Пасхы. Заходить на місце, котре ся зве Віфтезда – дім милосердя. Што то было за місце. Была там вівча купальня, де обмывали звірята призначены на жертву в Єрусалимскім храмі. Но было там пять дворців, де лежало много хворых різной сорты. А чом? Бо ангел Божый на часы сходив і сколотив воду. А хто першый вошов до воды, набывав здравя з будьякой ховороты. І там быв чоловік, котрый довгы рокы там находив ся.

Ісус приходить ку ньому і ся го звідує, хочеш быти здравый? Но він ся не образив на тоты слова, та хто бы не хотів? Але додав, я не мам чоловіка, котрый бы ня скоро зніс, як ся воды схолотять. А кедь там сам зыйду, та іншый мене опередить, я ту так лежу. А Ісус йому повів, бер свою постіль а ідь. А тот чоловік послухав голос Господа, встав а ішов.

Но Жыде намісто радости з тым бідным чоловіком, жебы прославити Бога за таке чудесне діло,  гнівають ся, бо тот чоловік несе постіль в суботу. А выздравленый ся одкликав на чоловіка, котрый його выздравив. А так тот выздравленый іде до храму, жевы выразити вдячность Господу Богу. Там го Ісус нашов. Повідать йому: Смоть єсь здравый, мерькуй, веце не гріш, жебы ся з тобов не стало дашто гірше. Што нам тоты слова говорять?

Указують од початку того діалоґу з тым невладным велику Божу любов. Ісус указує, же мать час на того чоловіка. Давать нам приклад ся заставити і мати час на ближнього в потребі. Ісусови в тім єднім чоловіку залежыть на каждім. На цілім людьстві, котре пришов ослободити, выздравити з той духовной паралізы. Як бы говорив тому чоловіку, ты не маш чоловіка, но маш Бога, свойого Сотворителя. Він його пінимать своїм словом: Встань. А хворый встав. А тыж і в тых словах напомянутя видиме Божу любов. Ісус так указує, же тот чоловік упав до біды про свої гріхы. Но лем кедь пришов ку ньому, Ісус йому нич вытыкав. Але говорить, встань. А як быв выздравленый, потім додав, мерькуй, не вертай ся назад до гріха. Бо мі на тобі залежыть. Прияв єсь тото тіло здравя і свойой душы. Теперь є чіста. Но мерькуй, бо може ся з тобов, коли не послухаш, і вернеш ся знову до гріха, стати дашто, што я не хочу. То є вічна погыбель.

Так днешнім словом Ісус говорить і ку нам. Я єм воскрес. Я можу воскрестити і вас з той духовной паралізы гріха ку новому жывоту. З мойой стороны было зроблено вшытко. Коли ня послухате, будете здравы і наслідниками мойого царьства. Но тыж давать напомянутя в любви. Коли не послухате, і добровольно ся вернете до гріха. Та хоць ту є моє милосердя безконечне, без огранічіня, но може прийти несподіваный момент смерти, застигнути в ставі гріха, а потім ся може стати овельо гірше, як тото описане в днешнім Євангелію.

Так як радости неба ся не дають порівнати з радостями земныма, так і вічны мукы ся не дають порівнати з муками на землі, од котрых нас Хрістос свойов смертьов ослободив, отворив Небесне Царьство. Но мы рішіньом свойой волі там можеме попасти. Прото говорить днесь і нам: Мерькуйте, жебы ся не стало з вами дашто гірше. Хрістос воскрес!

В неділю, 11. мая 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. мая 2025 р. о 12.00 год. і 12. мая 2025 р. о 2.00 год. за русиньскым часом.