«Слово» – Неділя сліпого – неділя, 9.00 год.

Неділя сліпого є послідньов недільов пасхалного часу. Ісус в днешнім слові указує нам, же Він є правдиве світло, а хто Його наслідує, не буде ходити в темноті, але буде мати світло жывота.

Указує нам то на прикладі чоловіка, котрый быв сліпый од народжіня. Ісус, коли його увидів, приступив ку ньому, плювнув на землю, зробив із слины і глины болото, помазав очі і послав омыти ся в купальні Сілоам. Тот чоловік, як ся вернув, уж видів.

Ісус такым способом выздравліня указав, же є тот самый Сотворитель, котрый на початку сотворив чоловіка з пороху землі а вдыхнув безсмертну душу. І ту хоснує глину і слину а творить очі сліпому.

Тото познаня одкрывать сліпому, але і нам. Своїм воскресіньом нам подаровав вічный жывот. Зничів владу смерти і діавола. Учіть нас смотрити новыма очами на тот світ, на добра того світа, на його поминаючость, на славу того світа, котра є куртов, на богатство, котре є непевне, на тот жывот, котрый є барз куртый, а не знаме дня ани годины.

Посмотьме на фарізеїв, архієреїв, котры хоць мали тілесны очі, предці были сліпы, бо не хотіли прияти правдиве світло. А тот чоловік, котрый перед тым непотрібный никому, теперь ся ставать хосенный вшыткым. Бо він указує на Хріста, на правдиве світло, котре просвітило його самого і вшыткых, котры ку Ньому з віров приходять.

Приймиме і мы правдиве світло – світло Воскресіня, дайме провітити нашы духовны очі. А смотьме тым новым поглядом на вшытко, што є коло нас. Коли засвітило світло, перебывайме у світлі а не вертайме ся назад до темноты – рабства гріха, смерти і діавола. Хрістос воскрес!

В неділю, 21. мая 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. мая 2023 р. о 12.00 год. і 22. мая 2023 р. о 2.00 год. за русиньскым часом.